ललितपुर – जिल्ला प्रहरी परिसर ललितपुरले दुई अलग-अलग स्थानमा छापा मार्दै १९ जना जुवाडेलाई नियन्त्रणमा लिएको छ।

प्रहरीका अनुसार मिति आइतबार साँझ करिब ५ बजे महालक्ष्मी नगरपालिका–५ टीकाथलीस्थित सुरेश नापितको घरकोठामा नगद रकम र सम्पत्तिको हारजित हुने गरी अवैध रूपमा जुवातास खेलिरहेको सूचनाका आधारमा प्रहरीले छापा मारेको थियो।

उक्त कारबाहीमा प्रहरी प्रभाग इमाडोलका प्रहरी निरीक्षक यज्ञराज जोशीको कमाण्डमा र जिल्ला प्रहरी परिसर ललितपुरका प्रहरी नायब निरीक्षक ईश्वर अधिकारीको टोली खटिएको थियो।

टोलीले उक्त स्थानबाट ९ जना व्यक्ति, १९ बुक तास र नगद चार लाख ९४ हजार पाँच सय रुपैयाँ बरामद गरेको जनाएको छ।

त्यसैगरी, महालक्ष्मी नगरपालिका–१ रातामकै चोकस्थित जीवन थापाले सञ्चालन गरेको स्वाद रेस्टुरेन्टको तेस्रो तलामा पनि प्रहरीले जुवातास खेलिरहेको अवस्थामा १० जनालाई नियन्त्रणमा लिएको छ।

उक्त स्थानबाट नगद आठ लाख ७५ हजार एक सय पचास रुपैयाँ बरामद गरिएको प्रहरीले जनाएको छ।

दुवै घटनाका पक्राउ परेकाहरूलाई जिल्ला प्रहरी परिसर ललितपुरमा राखी आवश्यक अनुसन्धान भइरहेको प्रहरीले जनाएको छ।