काठमाडौं- प्रमुख सत्तारुढ नेकपा एमालेका सांसदहरूले हाल राष्ट्रियसभामा विचाराधीन बहुचर्चित संघीय निजामती विधेयकमा संशोधन हालेकोप्रति नेपाली कांग्रेसका नेता डा. शेखर कोइरालाले आपत्ति प्रकट गरेका छन् ।

एमालेका पाँचजना सांसदहरूले उक्त विधेयकमा संशोधन प्रस्ताव हालेको सार्वजनिक भएपछि कोइरालाले आइतबार साँझ सामाजिक सञ्जालमार्फत् आपत्ति प्रकट गरेका हुन् ।

‘नेकपा एमालेका सांसदहरुले राष्ट्र्यिसभामा संघीय निजामती विधेयकमा हालेको संशोधन आपत्तिजनक छ’, उनले भनेका छन्, ‘गठबन्धनका दलबीच भएको सहमति र समितिमा भएको सर्वसम्मतिविपरीत यसरी आफ्ना सांसदहरूलाई संशोधन हाल्न लगाउनु एमालेको दोहोरो चरित्र मात्रै नभई उसले देश, जनता, लोकतन्त्र र गठबन्धनलाई दिएको धोका पनि हो ।’

कोइरालाले यसबारेमा कांग्रेसले एमालेको आधिकारिक धारणा माग गर्नुपर्ने बताए । ‘सबै मिलेर एमालेले हालेको संशोधन पास हुन दिनु हुन्न । कुलिङ पिरियड रहन्छ, रहन्छ र रहन्छ । कोही द्विविधामा नपरे हुन्छ ।’

एमालेबाट राष्ट्रिय सभाका ५ जना सांसदले कुलिङ पिरियडको विपक्षमा संशोधन हालेका थिए । उनीहरूले निजामती सेवामा ‘कुलिङ पिरियड’ लागु गर्ने प्रावधान नराखी ऐन बनाउनुपर्ने प्रस्ताव गरेका छन् ।

एमालेका राष्ट्रिय सभा सदस्य गोपाल भट्टराईले पाँचजना सांसदले विधेयकमा संशोधन हालेको बताएका छन् । सांसद सोनाम गेल्जेन शेर्पा, इन्दिरादेवी गौतम, रुक्मिणी कोइराला, सुमित्रा बीसी र भट्टराईले पनि संशोधन हालेका हुन् ।

सङ्घीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकमा राष्ट्रियसभामा एमालेका ५ सहित १६ संशोधन प्रस्ताव परेका छन् ।

राष्ट्रियसभाको विधि व्यवस्थापन महाशाखाले ४३ सांसदले १६ संशोधन प्रस्ताव दर्ता गरेको जनाएको छ । राष्ट्रियसभाका सांसदहरूलाई संशोधन हाल्ने समय शुक्रबार ५ बजेसम्मलाई तोकिएको थियो ।