काठमाडौं– प्रतिनिधिसभाका सभामुख देवराज घिमिरेले सिंहदरबारमा निर्माणाधीन नयाँ संसद् भवनबाट सभा सञ्चालन गर्न अझै केही समय लाग्ने बताएका छन्  ।  

आइतबार संसद् भवन नयाँ बानेश्वरमा विभिन्न मुलुकहरूबाट नेपाल आएका कलाकारसँगको साक्षात्कारमा सभामुख घिमिरेले निर्माणाधीन नयाँ संसद् भवनको चाडै निर्माण सम्पन्न गर्न लक्ष्य राखे पनि विभिन्न कारणले अझै निर्माणकै क्रममा रहेकाले नयाँ भवनबाट सभा सञ्चालन गर्न अझै केही समय लाग्ने बताएका हुन्  ।

उनले कलाकारहरूलाई सांसदहरूको संख्या र पुरानो भवनबाट सभा सञ्चालन गर्न असम्भव भएका कारण बानेश्वरको सम्मेलन केन्द्रलाई भाडामा लिएर संघीय संसद्को सभा सञ्चालन भइरहेको जानकारी गराए ।

सभामुख कलाकारिताको माध्यमबाट संसारभर छरिएर रहेका नेपालीहरूलाई नेपालीपनको परिचय दिन सक्ने धारणा राखे । 

इन्ट्रा नेसनल वेलफेयर एन्ड सपोर्ट फाउन्डेसन अफ अमेरिकाको आयोजनामा सञ्चालित अन्तर्राष्ट्रिय नेपाली रियालिटी शो ‘मेरो भ्वाइस युनिभर्स र मेरो डान्स युनिभर्स’ मा विभिन्न मुलुकहरूबाट नेपाल आएका कलाकारसँग सभामुखले साक्षात्कार गरेका हुन् ।