काठमाडौं- राष्ट्रिय स्वतन्त्र पार्टी (रास्वपा)को महामन्त्रीबाट हटाइएका मुकुल ढकालको विवरण एक वर्षसम्म अद्यावधिक नभएपछि वर्तमान महामन्त्री कविन्द्र बुर्लाकोटी निर्वाचन आयोगमा पुगेका छन् ।

काबारही गरेको एक वर्षसम्म पनि रास्वपाले विवरण अध्यावधिक नगरेको अवस्थामा कानुन व्यवसायीसहित बुर्लाकोटी ध्यानाकर्षण गराउन निर्वाचन आयोगको केन्द्रीय कार्यालयमा पुगेका हुन् ।

उनले आफू रास्वपाको महामन्त्री हेरफेरको विवरण अझै अद्यावधिक नगरेको भन्दै आयोगप्रति रोष प्रकट गरेका छन् ।

रास्वपाको केन्द्रीय समितिका पदाधिकारी तथा सदस्यको हेरफेर १५ महिनाअघि भएको थियो । तर त्यसपछि हालसम्म विवरण अद्यावधिक भएको अभिलेखबाट नदेखिएको आयोगले गत असार ६ गते जनाएको थियो ।

त्यहीकारण कानुनी रुपमा रास्वपाको महामन्त्री ढकाल नै भएको आयोगले जनाएको थियो । ढकालले पनि आफू कानुनी रुपमा महामन्त्री रहेको दाबी गरिरहेका छन् ।

त्यसबेला आयोगले भनेको थियो, ‘प्रस्तुत विषयमा तपाईंले यस आयोगमा मिति २०८२/०३/०४ मा दर्ता गर्नु भएको निवेदन माग बमोजिम राष्ट्रिय स्वतन्त्र पार्टी (रास्वपा)को केन्द्रीय समितिका पदाधिकारी तथा सदस्यको हेरफेर भएको विवरण मिति २०८०/१२/२० मा अद्यावधिक भएको थियो । त्यसपछि हालसम्म अद्यावधिक भएको अभिलेखबाट नदेखिएको ब्यहोरा आदेशअनुसार अनुरोध छ।’

उता रास्वपाबाट निस्कासित महामन्त्री डा. मुकुल ढकालले आफूमाथि गरिएको कारबाहीविरुद्ध अदालतमा दिएको मुद्दा अझै विचाराधीन छ ।

यो अवस्थामा अदालतमा मुद्दा गएपछि अद्यावधिक प्रक्रिया रोक्नुपर्ने कारण नरहेको रास्वपा नेताहरूले बताइरहेका छन् । बुर्लाकोटीले पनि अदालतका नाममा पार्टीको निर्णय अद्याविधक गर्ने काम रोक्नु आपत्तिजनक रहेको बताए ।