इजरायल – इरान र इजरायल युद्ध सुरु भएपछि धेरै देशले तेहरानबाट आफ्नो दूतावास हटाएका छन्।

यसरी हटाउनेमा चेक गणतन्त्र, अस्ट्रेलिया, स्वीजरल्यान्ड र नेदरल्यान्ड छन्।

धेरै देशले ती दुवै देशबाट आफ्ना नागरिकलाई फिर्ता लगिरहेका छन्। अस्ट्रेलियाले इरानबाट १५०० तथा इजरायलबाट १२०० जनालाई फिर्ता बोलाएको छ। इजरायलबाट जहाज चढेर साइप्रसको बाटो हुँदै उनीहरू फर्किएका हुन्।

चीनले इरानबाट १६०० जनालाई फिर्ता लगेको छ। यसैगरी, इजरायलबाट पनि सयौँको मात्रामा आफ्ना नागरिकलाई फिर्ता बोलाएको छ।

चीनले आफ्ना नागरिकलाई अजरबैजान, तुर्केमिनिस्तान, टर्की, अर्मेनिया र इराकको बाटो हुँदै मानिसलाई फिर्ता बोलाएको छ।

११० जना भारतीय इरानबाट जमिनको बाटो हुँदै अर्मेनिया पुगेर त्यहीँबाट दिल्ली गएका छन्। भारतले इजरायलबाट पनि आफ्ना नागरिक फिर्ता बोलाउने योजना बनाएको छ। इजरायलमा ३० हजार भारतीय छन्।

जापानले जिबाउटीको बाटो हुँदै इजरायल र इरानबाट आफ्नो नागरिक फिर्ता बोलाउने तयारी गरेको छ। इजरायलमा एक हजार तथा इरानमा २८० जापानी छन्। युद्ध सुरु भएपछि पाकिस्तानले इरानबाट आफ्ना तीन हजार नागरिकलाई फिर्ता गरेको छ। पाकिस्तानले आफ्नो नागरिक भन्दा बाहेक अन्यका लागि इरानको सीमा बन्द गरिसकेको छ।