काठमाडौं– १२ घण्टासम्म औद्योगिक क्षेत्रमा लोडसेडिङ हुनसक्ने भन्दै आएको समाचारले आफूहरूलाई गम्भीर बनाएको नेपाल उद्योग परिसंघ कोशी प्रदेशले जनाएको छ । 

बिहीबार प्रेस विज्ञप्ति जारी गर्दै संघले विगत ६-७ वर्षदेखि नेपाल विद्युत प्राधिकरणको असान्दर्भिक नीतिका कारण धरासायी हुँदै आएको औद्योगिक क्षेत्र पुनः उर्जा मन्त्रालय र प्राधिकरणको कारणले थप धराशायी हुने स्थिति सिर्जना भएको भन्दै आपत्ति प्रकट गरेको हो ।

‘विगत ६-७ वर्षदेखि नेपाल विद्युत प्राधिकरणको असान्दर्भिक र अव्यवहारिक नीतिका कारण आर्थिक औद्योगिक क्षेत्र धराशायी भएको र यसलाई सुधार गर्न हामीले पटक-पटक अनुरोध गरिएको वावजुद कुनै सुधार नभएको र अहिले उर्जा मन्त्रालय र विद्युत प्राधिकरणको टकराव र समन्वयको अभाव तथा असमझदारीले गर्दा विद्युत आपूर्तिमा अवरोध हुने अवस्था सृजना भै आज फेरि आर्थिक औद्योगिक क्षेत्र धराशायी हुने अवस्थामा पुगेको हाम्रो निष्कर्ष रहेको छ र यस प्रति हाम्रो गम्भीर ध्यानाकर्षण भएको छ र नेपाल सरकार उर्जा मन्त्रालय तथा नेपाल विद्युत प्राधिकरणको असान्दर्भिक व्यवहार र असमझदारी प्रति हाम्रो घोर आपत्ति पनि रहेको छ’, संघद्वारा जारी विज्ञप्तिमा भनिएको छ ।

साथै, अहिले पनि औद्योगिक क्षेत्रमा ४ देखि ६ घण्टा लोडसेडिङ भइरहेको संघले जनाएको छ ।