काठमाडौं– चालु आर्थिक वर्षको ८ महिनामा अघिल्लो आर्थिक वर्षको सोही अवधिको तुलनामा नेपालको निर्यातमा ५७.२० प्रतिशतले वृद्धि भएको छ । 

गत आर्थिक वर्षको फागुन मसान्तसम्म नेपालबाट १ खर्ब ६१ करोड ७४ लाख ४५ हजार रुपैयाँ बराबरको निर्यात भएको थियो । तर, चालु आर्थिक वर्षको सोही अवधिमा भने निर्यात वृद्धि भएर १ खर्ब ५८ अर्ब १७ करोड २४ लाख २ हजार रुपैयाँ बराबर पुगेको छ ।

तर, नेपालको निर्यात वृद्धि भएको तथ्यांक देखाउने ठूलो हिस्सा सबैभन्दा धेरै सोयाबिन तेल र सो सँग सम्बन्धित पदार्थ रहेको छ । चालु आर्थिक वर्षको फागुन मसान्तसम्म नेपालबाट ७ अर्ब ९४ करोड ७१ लाख ५ हजार रुपैयाँ बराबरको सोयाबिन तेल निर्यात भएको देखिन्छ । 

जबकी सोही अवधिमा नेपालमा ५१ अर्ब ८ लाख ३१ हजार रुपैयाँको सोयाबिन तेलको कच्चा पदार्थ आयात भएको छ ।

सोयाबिन तेलको कच्चा पदार्थ आयात गरेर आंशिक वा पुरै प्रशोधन पश्चात नेपालबाट फेरि सोयाबिन तेल निर्यात भएको भन्सार विभागको तथ्यांकले देखाएको छ । जसको परिमाणले नै नेपालको कुल निर्यातमा सबैभन्दा धेरै हिस्सा ओगटेको छ ।

त्यस्तै, नेपालको निर्यातमा अर्को ठूलो हिस्सा सूर्यमुखी तेलको रहेको देखिएको छ । चालु आर्थिक वर्षको फागुन मसान्तसम्म नेपालमा २० अर्ब ४८ करोड ८३ लाख ४४ हजार रुपैयाँ बराबरको सूर्यमुखी तेलको कच्चा पदार्थ र दाना आयात भएको थियो ।

जबकी सोही अवधिमा नेपालबाट ७ अर्ब ९८ करोड २३ लाख ५२ हजार रुपैयाँको सूर्यमुखी तेलको निर्यात भएको छ । सूर्यमुखी तेलको कच्चापदार्थको आयातको तुलनामा निर्यात दुई तिहाइले कम भएको विभागको तथ्यांकले देखाउँछ ।