काठमाडौंँ– नेपाली कांग्रेस सांसद दुर्लभकुमार थापाले सहकारी ठगीमा थुनामा रहेका राष्ट्रिय स्वतन्त्र पार्टीका सभापति रवि लामिछानेलाई लक्षित गर्दै जेलमा ससुराली घरमा जस्तो मेजमानी नपाइने बताएका छन् ।

मंगलबार हस्ताक्षर संकलनपछि सिंहदरबारमा सञ्चारकर्मीसँग कुरा गर्दै भक्तपुरबाट निर्वाचित सांसद थापाले अहिले कांग्रेस र एमालेलाई सबै दोष लगाएर आफू मात्रै असल देखाउने प्रवृत्ति बढेको उल्लेख गरेका छन् ।

‘कांग्रेस र एमालेलाई मात्रै दोष लगाएर सबै राम्रो हुँ भन्छन् । पार्टी गतिलो छ भनेर कुन उदाहरण छ ?’, उनले सोधे, ‘व्यक्ति पनि एउटाको उदाहरण दिनुस् न। जेल भनेको ससुराली घर गएको जस्तो होइन नि ! ढोका टालेको छ, झ्याल टालेको छ ।’

थापाले प्रधानमन्त्री केपी शर्मा ओलीको उदाहरण दिँदै परिवर्तनका लागि १४ वर्ष कालकोठरीमा बस्ने नेतामाथि अनेक आरोप लाउने गरिएको बताए । देशमा परिवर्तनका लागि जेल बस्नेलाई चोरको संज्ञा दिनेले अहिले ठग नै असल भएको भन्ने प्रवृत्तिलाई अस्वीकार्ने पनि थापाले बताए ।

उपसभामुख इन्दिरा रानामगरलाई हटाउन सोमबार सिंहदरबारमा नेपाली कांग्रेस र नेकपा एमालेका सांसदबाट हस्ताक्षर संकलन गरिएको छ । त्यही क्रममा थापा पनि सिंहदरबार छिरेका थिए ।