काठमाडौं- केपी शर्मा ओली नेतृत्वको सरकारबाट बाहिरिएको घोषणा गरिसकेको महिना बितिसकेको अवस्थामा नागरिक उन्मुक्ति पार्टी (नाउपा) की अध्यक्ष रञ्जिता श्रेष्ठ पनि सत्ता गठबन्धनको बैठकमा सहभागी भएकी छन् ।

उपसभामुख इन्दिरा रानालाई हटाउने तयारी भइरहेका बेला सिंहदरबारस्थित नेपाली कांग्रेस संसदीय दलको कार्यालयमा बसेको बैठकमा भाग लिन उनी पनि पुगेकी हुन् ।

नाउपाबाट सरकारमा सहभागी संस्कृति, पर्यटन तथा नागरिक उड्डयन राज्यमन्त्री अरुणकुमार चौधरीले राजीनामा दिइसकेका छन् । तर अझैसम्म उनको राजीनामा स्वीकृत भएको जानकारीमा आएको छैन ।

सरकारबाट मन्त्री बाहिरिएर समर्थन पनि समर्थन फिर्ता लिएको घोषणा गरेको अवस्थामा रञ्जिता सत्ता गठबन्धनमा जोडिएकी हुन् ।

प्रतिनिधिसभामा अहिले नाउपाका चार सांसद छन् । उपसभामुख रानालाई हटाउन सत्ता गठबन्धनलाई नाउपाको अनिवार्य साथ चाहिन्छ । तर नाउपामा पनि रञ्जिता र संरक्षक रेशमबीच किचलो छ । रेशमले पहिलो राष्ट्रिय भेला बोलाएर रञ्जितालाई हटाएको निर्णयलाई निर्वाचन आयोगले अमान्य घोषित गरिदिएको छ ।