काठमाडौं– देशका विभिन्न स्थानमा भएका आगलागीबाट नौ लाख रुपैयाँ बराबरको क्षति भएको छ । 

उदयपुरको ताप्ली गाउँपालिका-२ चिसापानी बस्ने ४८ वर्षीय गणेश बहादुर श्रेष्ठको कुखुरा फर्ममा विद्युत् सर्ट भई मंगलबार राति आगलागी हुँदा करिब ५ लाख रुपैयाँ बराबरको धनमाल जलेर नष्ट भएको छ ।

त्यसैगरी पाँचथरको फिदिम नगरपालिका-५ सरसिउला बस्ने कोपिला सिवाको घरमा विद्युत् सर्ट भई मंगलबार दिउँसो आगलागी हुँदा घर पुर्णरूपमा जलेर करिब ४ लाख रुपैयाँ बराबरको धनमाल नष्ट भएको छ ।

दाङको बबई गाउँपालिका-४ हस्तानापुरस्थित सडकमा टाइगर चोकबाट हापुरेतर्फ कपास लोड गरी आउँदै लु.१ च ५५०३ नम्बरको ट्रकमा बुधबार दिउँसो आगलागी हुँदा करिब ३ कुईन्टल कपास जलेर क्षति भएको छ ।

प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।