काठमाडौं– पूर्वप्रधानमन्त्री डा. बाबुराम भट्टराईले राज्यको उच्च ओहदामा बसिसकेका व्यक्तिहरूले राष्ट्रिय दिवसहरूको सम्मान गर्ने न्यूनतम दायित्व निर्वाह गर्नै पर्नेमा जोड दिएका छन् ।

प्रजातन्त्र दिवसको अवसरमा बुधबार टुंडिखेलस्थित सैनिक मञ्चमा आयोजित समारोहमा पूर्व प्रधानमन्त्रीहरू उपस्थित नभएपछि भट्टराईले फरक राजनीतिक आस्था भए पनि राष्ट्रिय दिवसहरूको सम्मान गर्ने न्यूनतम दायित्व निर्वाह गर्नै पर्ने बताएका हुन् ।

‘राष्ट्रिय दिवसहरूबारे कतिपय सच्याउनु पर्ने कुरा छन् । तीबारे पुनर्विचार गरेर संख्या घटाउनुपर्छ भन्ने मेरो सुरूदेखि नै दृढ मत छ । तर, अर्को निर्णय नभएसम्म राष्ट्रिय दिवसहरूलाई सबैले सम्मान गर्नुपर्दछ,’ उनले एक्स (ट्विटर)मा लेखेका छन्, ‘खासगरी राज्यको उच्च ओहदामा बसिसकेका व्यक्तिहरूले आआफ्ना फरक राजनीतिक आस्थाका बाबजुद राष्ट्रिय दिवसहरूको सम्मान गर्ने न्यूनतम दायित्व निर्वाह गर्नै पर्छ ।’\

उनले प्रजातन्त्र दिवसको अवसरमा राज्यद्वारा आयोजित समारोहमा पूर्वप्रधानमन्त्रीहरू उपस्थित नभएकाले आफूले नमिठो अनुभूति गरेको पनि उल्लेख गरेका छन् । 

‘फागुन ७ गते प्रजातन्त्र दिवसको उपलक्ष्यमा राज्यद्वारा सैनिक मञ्चमा आयोजित र शीर्ष ६ उपस्थित निकै आकर्षक कार्यक्रममा सरकार पक्षकै पूर्वप्रम तथा बहालवाला उपप्रमलगायतका वरिष्ठ व्यक्तित्वहरू र प्रमुख प्रतिपक्षी दलका नेता लगायतका पूर्व प्रमहरू (यो बबुरो बाहेक!) कोही पनि उपस्थित नभएको देख्दा निकै नमिठो अनुभूति भयो,’ उनले लेखेका छन् ।
 
उनले भनेका छन्, ‘यस पटक मात्र हैन प्रायः सधैँ यस्तो दृश्य देख्नु पर्दा मन खिन्न हुन्छ । आखिर किन यस्तो हुन्छ ?’