काठमाडौं– नेपाल डेरी एसोसिएशनको २६औँ साधारणसभा तथा स्थापना दिवस-२०८१ बुटवलमा सोमबार आयोजना हुने भएको छ ।  

आइतबार बुटवलमा पत्रकार सम्मेलन गरी एसोसिएशनका अध्यक्ष प्रल्हाद दाहालले बुटवलमा हुने साधारणसभाको तयारी पुरा भएको जनाए । 

उद्योगीको हकहितमा अग्रसर संस्थाको माघ ७ गते सोमबार स्थापना दिवस अन्तरगत सातै प्रदेशका उत्कृष्ट उद्योगीलाई सम्मान, दीर्घ सम्मान, राष्ट्रिय डेरी सम्मान, कृषि पत्रकारिता सम्मान गरिने उनले बताए । 

उनले दैनिक संकलन उत्पादन ६२ लाख लिटर दूध उत्पादन हुने गरेकोमा त्यसको आधामात्र बजारमा खपत भइरहेको जानकारी दिए । निजी क्षेत्रको डेरी उद्योगमा अनुमानित लगानी ५० अर्ब रहेको र ५० हजार जनालाई रोजगार दिन सफल भएको उनले बताए ।  

कार्यक्रममा एसोसिएशनका लुम्बिनी प्रदेश अध्यक्ष थानेश्वर न्यौपानेले नेपालको राष्ट्रिय उत्पादनमा लुम्बिनी प्रदेशबाट कुल खाद्यान्न उत्पादनमध्ये दूधजन्य उत्पादन ४ लाख ८ हजार २०६ मेट्रिक टन अर्थात् १७ दशमलव ९ प्रतिशत रहेको बताए ।