काठमाडौँ- गत भदौ २७ गते पूर्वप्रधानन्यायाधीश सुशीला कार्की प्रधानमन्त्री बनेयता दक्षिणी छिमेकी भारत निरन्तर संवादमा छ ।

शीतल निवासमा कार्कीले अन्तरिम सरकारको शपथ लिँदा भारतीय राजदूत नवीन श्रीवास्तवले त्यहीँ पुगे बधाई दिए ।

त्यसको भोलिपल्ट भारतीय प्रधानमन्त्री नरेन्द्र मोदीले मणिपुर पुगेर प्रधानमन्त्री कार्कीलाई बधाई दिँदै नेपाल-भारत सम्बन्धको लामो चर्चा गरे ।

त्यसपछि ३१ भदौमा सिंहदरबार छिरेर भारतीय राजदूत नवीन श्रीवास्तवले प्रधानमन्त्री कार्कीलाई बधाई दिए । त्यही दिन मोदी र कार्कीबीच हुने भनिएको टेलिफोन संवाद सम्भव भएन ।

जुन बिहीबार सम्भव भएको छ । मोदी कार्कीबीच भएको टेलिफोन संवादमा दुई देशबीचको सम्बन्ध बलियो बनाउन कुराकानी भएको दुवै पक्षको सचिवालय र नेपालस्थित भारतीय दूतावासले पनि जनाएको छ ।

प्रधानमन्त्री मोदीले कार्कीलाई बधाई दिँदै भारत सरकार र भारतीय जनताको तर्फबाट शुभकामना पनि दिएका छन् । मोदीले भदौ २३ र २४ गते नेपालमा भएका विरोध प्रदर्शनका क्रममा ज्यान गुमाएकाहरूप्रति समवेदना प्रकट गरे ।

उनले दुई देशबीचको विशेष सम्बन्धलाई थप सुदृढ पार्न सदैव मिलेर काम गर्न भारत तत्पर रहेको पनि बताए ।

शान्ति र स्थिरता पुनर्स्थापना र नेपाली जनताको प्रगतिका लागि नेपालको प्रयासमा भारतको पूर्ण समर्थन रहेको कुरा पनि मोदीले कार्कीलाई बताएका छन् ।

यता नेपालकी प्रधानमन्त्री कार्कीले भारतको दृढ समर्थनका लागि धन्यवाद दिएकी छन् । दुई देशबीचको सम्बन्धलाई अझ सुदृढ पार्ने समकक्षी मोदीको इच्छालाई समर्थन पनि गरेकी छन् ।

प्रधानमन्त्री मोदीले नेपालको संविधान दिवसको पनि शुभकामना दिएका छन् । दुवै प्रधानमन्त्रीले निरन्तर सम्पर्कमा रहने सहमति जनाएका भारतीय दूतावासले जानकारी दिएको छ ।

यता बिहीबार नै दुई शक्ति राष्ट्र चीन र अमेरिकाका राजदूतले पनि प्रधानमन्त्री कार्कीलाई सिंहदरबार पुगेर बधाई दिएका छन् ।