काठमाडौं– प्रतिनिधिसभाका सभामुख देवराज घिमिरेले जेन-जी आन्दोलनका क्रममा आगजनीबाट ध्वस्त भएको संघीय संसद् भवनको निरीक्षण गरेका छन् ।  

बिहीबार सभामुख घिमिरेका साथै उपसभामुख इन्दिरा राना, कांग्रेस र एमालेका नेताहरूले आगजनीबाट ध्वस्त भएको संघीय संसद् भवनको निरीक्षण गरेका हुन्  । सभामुख घिमिरेले आगजनीबाट ध्वस्त भएको बैठक कक्षका साथै अन्य संरचनाको निरीक्षण गरे ।

निरीक्षणपछि सभामुख घिमिरेले आन्दोलनका नाममा भएको तोडफोड र आगजनीको घटना निकै दुखद भएको बताए । यस अवस्थाबाट उठेर ठिक ढंगले अगाडी जाने सबैको दायित्व भएको उनले बताए । सभामुख घिमिरेले संसद् विघटन नगरी यसैबाट समस्याको समाधान खोज्न सकेको भए राम्रो हुने प्रतिक्रिया दिए ।

उनले अन्तरिम सरकारको अगाडि ठूलो जिम्मेवारी रहेकाले सबै समस्याको समाधान गर्नेगरि अघि बढ्नुपर्ने सुझाव दिए । 

अहिले मुलुकमा गम्भीर परिस्थिति सिर्जना भएकाले यसको समीक्षा जरुरी रहेको उनले बताए । जेनजी आन्दोलनका क्रममा संसद् भवनमा आगजनी हुँदा पूर्णरुपमा जलेको छ । 

सरकारले निर्वाचनपछि सिंहदरबारमा निर्माण भइरहेको नयाँ संसद् भवनबाट बैठक सञ्चालन हुने गरी तयारी गरेको छ ।