काठमाडौँ- गत भदौ २४ गते जेन-जी आन्दोलनका नाममा गरिएको हिंसात्मक प्रदर्शनका क्रममा जलाइएका सरकारी संरचनाको आगो निभाउन नगएको आरोप काठमाडौँ महानगरपालिकाका मेयर बालेन्द्र साहले खेपिरहेका छन् ।

सिंहदरबार, संसद् भवन, सर्वोच्च अदालत र शीतल निवाससहितका गणतन्त्रका प्रतीक जल्ला बालेन रमिते बनेर बसेको आरोप लागिरहेका बेला उनले महानगर प्रहरी प्रमुख राजुनाथ पाण्डेलाई बोल्न लगाएका छन् ।

बिहीबार पत्रकार सम्मेलन गरेर पाण्डेले महानगरको दमकलले भाटभनेटनी सुपरमार्केट र सिंहदरबारसहितमा लागेको आगो निभाउन दमकल परिचालन गरेका जिकिर गरेका छन् ।

‘न्यूरोडमा रहेको जनसेवा प्रहरी र हिमालयन बैंक जलेकाले स्थानीयले हामीलाई त्यहीँ निभाउन रोक्दा समस्या भयो । हाम्रा दमकल विभिन्न ठाउँमा गएका हुन्’, उनले भने, ‘दमकल सुरक्षित भएर जान सक्ने अवस्थामा ढिलाइ गरेका थिएनौँ । बालाजु र स्वयम्भू क्षेत्रमा दमकलमा पानी सकिएपछि ट्यांकरहरूलाई सहयोगका रुपमा लिएका थियौँ । फिल्डमै पानी फिलिङ गर्ने अवस्थामा चुकेका छैनौँ ।’

उनले सरकारका ठूला संरचनाको आगो निभाउन दमकल नपठाएको कुराको खण्डन गरेका छन् । तर अहिले पनि आगो ननिभेर सिंहदरबार जलिरहेको छ।

‘महानगरले दमकल पठाए भन्ने कुरा गलत हो । बाटो क्लियर होस् भनेर बसेका थियौँ । नेपाली सेनाको गणेश दल र जंगी अड्डासँग पनि समन्वयमा थियौँ’, उनले भने, ‘खानेकुरा र औषधि पठाउन पनि नगर प्रहरी खटिएका थिए । कुनै समस्या नहोस् भन्न खटिएका थियौँ । रगत आवश्यक हुँदा पनि प्रहरीहरूलाई पठाएका थियौँ ।’

रगत संकलनका लागि पनि नगर प्रहरी पठाइएको उनले बताए । ‘हामी कर्तव्यबाट चुकेका थिएनौँ । सिंहदरबारसहितमा सुरक्षाका कारणले आगो निभाउन सकेनौँ’, उनले भने, ‘सिंहदरबार र सर्वोच्च अदालतमा हाम्रो प्राथमिकतामा थियो । एकै ठाउँमा १०/१५ पटक पनि पुगेका छौँ । दुई तीन दिन हाम्रो प्रहरी नसुती खटिएको थियो ।’