काठमाडौं– नेकपा एमालेका अध्यक्ष केपी शर्मा ओलीले पूर्वराष्ट्रपति विद्या भण्डारीलाई लिएर तीतो अभिव्यक्ति दिएका छन् ।

तीन दिनसम्म ललितपुरमा चलेको १० औँ केन्द्रीय कमिटी बैठकलाई सम्बोधन गर्दै उनले भण्डारीलाई आफूले अप्ठ्यारो बेलामा साथ दिएको बताएका छन् ।

केन्द्रीय कमिटी बैठकमा नेताहरूले पूर्वराष्ट्रपति भण्डारीको सदस्यता नवीकरण गर्नुपर्ने आवाज उठाएपछि ओली आक्रोशित भएका हुन् । उनले ती नेताहरूलाई मण्डारीको माइती बनेर पार्टी राजनीतिमा फर्काउने कुरा गर्न नहुने सुझाव दिए ।

‘जब उहाँ असजिलो अवस्थामा हुनुहुन्थ्यो, मैले सहयोग गरेको हुँ । म उहाँको अप्ठेरो बेलाको साथी हुँ’, ओलीले अगाडि भने, ‘कोही-कोही यहाँ विद्या भण्डारीको माइती बनेर आउनुपर्दैन । म विद्या भण्डारीलाई राम्रैसँग जान्दछु।’

बुधबारदेखि जारी बैठकमा अध्यक्ष ओलीले पार्टीको समसामयिक राजनीति, रणनीति र आगामी कार्यदिशाबारे केन्द्रित राजनीतिक प्रतिवेदन प्रस्तुत गरेका थिए ।

प्रतिवेदनमाथि धारणा राख्ने क्रममा ५० जना केन्द्रीय सदस्यहरूले विद्यादेवी भण्डारीको सदस्यता नवीकरण गर्नुपर्ने बताएका थिए ।

दसौँ केन्द्रीय कमिटी बैठकसम्म आइपुग्दा पूर्वराष्ट्रपति विद्यादेवी भण्डारीको सदस्यता नवीकरण गर्नुपर्ने आवाज बलियो बनेको छ।

गत साउन ५ र ६ गते बसेको केन्द्रीय कमिटीको नवौँ बैठकले पूर्वराष्ट्रपति भण्डारीको नवीकरण भइसकेको सदस्यता रोक्दै पार्टीमा फर्किन निषेध गरेको थियो ।