काठमाडौं– काठमाडौं महानगरपालिकाका मेयर बालेन्द्र साह स्रोत अनुमान तथा बजेट सीमा निर्धारण समितिको बैठक राख्न तयार भएका छन् ।  

तर, समितिका सदस्य सचिव एवम् प्रमुख प्रशासकीय अधिकृत सरोज गुरागाईंबिना नै बैठक राख्ने गरी मेयर साहले प्रशासनलाई प्रस्ताव तयार गर्न लगाएको महानगर स्रोतले जानकारी दिएको छ । 

स्थानीय तहले असार १० सम्ममा बजेट पेश गर्नुपर्ने कानुनी बाध्यता छ । असार मसान्तासम्म बजेट पारित गरिसक्नुपर्ने उल्लेख छ । तर, मेयर साह संयोजक रहेको स्रोत अनुमान तथा बजेट समितिको बैठक बस्न नसकेपछि बजेट अन्योलमा परेको थियो। 

कार्यपालिका र नगर सभा मात्रै होइन, स्रोत अनुमान तथा बजेट सीमा निर्धारण समितिको बैठकसमेत बस्न सकेको छैन । मेयर साहले समितिका सदस्य सचिव गुरागाईंबिना नै बैठक राख्ने कसरत गरेपछि त्यो पनि अन्योलमा पर्ने निश्चित भएको छ । 

साहले असार ४ गते ११ बजे मेयर आफ्नै कार्यकक्षमा बैठक बोलाएका छन्। तर, सदस्यसचिव अनिवार्य हुनुपर्ने बैठकमा गुरागाईंलाई ‘बाइपास’ गरेपछि बैठक अन्योलमा परेको महानगर स्रोतले जानकारी दिएको छ । 

समितिको सदस्यमा उपप्रमुख सुनिता डंगोलसँगै कार्यपालिका सदस्यहरू नवीन मानन्धर, नवराज पराजुली, मैयालक्ष्मी  महर्जन, अनिता कार्की डोली छन् ।  

स्थानीय सरकार सञ्चालन ऐन २०७४ को दफा १७ को उपदफा १ अनुसार  ‘कार्यपालिकाको बैठक कम्तीमा महिनाको एक पटक बस्नेछ’ भन्ने व्यवस्था छ । तर काठमाडौं महानगरपालिकाको कार्यपालिका बैठक ७ महिनादेखि बस्न सकेको छैन ।

नगरसभाको बैठक पनि ६ महिनामा अनिवार्य बस्नुपर्ने हुन्छ । अझ बजेटको सम्मुखमा नगरसभा बैठक बस्नै पर्ने बाध्यता छ । 

तर, मेयर साहले भने कार्यपालिका र नगरसभा दुवै राख्न सकेका छैनन् । त्यहीकारण  महानगरपालिकाका विकास निर्माण, नीतिगत निर्णयलगायतका काम पनि अन्योलमा परेका छन् ।