भोजपुर– स्थानीयवासीको पहल, श्रम र आर्थिक सहयोगबाट भोजपुर सदरमुकाम नजिकैको पानीट्याङ्की क्षेत्रमा ‘पेमा छ्योलिङ बौद्ध गुम्बा’ निर्माण गरिएको छ ।

बौद्ध धर्म–संस्कृतिको संरक्षणसँगै धार्मिक पर्यटन प्रवर्द्धन गर्ने उद्देश्यले करिब दुई करोड ३५ लाख लागतमा गुम्बा निर्माण गरिएको हो ।

देश तथा विदेशमा रहेका शेर्पा समुदायको उल्लेख्य योगदान र प्रदेश तथा स्थानीय सरकारको सहकार्यमा गुम्बा निर्माण गरिएको गुम्बा व्यवस्थापन समितिका कोषाध्यक्ष आङदावा शेर्पाले जानकारी दिए । उनका अनुसार कूल लागतको करिब ७८ प्रतिशत रकम शेर्पा समुदायबाट चन्दा सङ्कलन गरी जुटाइएको हो ।

‘धर्म, संस्कार र संस्कृतिको संरक्षणका लागि स्थानीयको सक्रियतामा गुम्बा निर्माण गरिरहेका छौँ’, कोषाध्यक्ष शेर्पाले भने, ‘हालसम्म करिब दुई करोड ३५ लाख बराबरको निर्माण सम्पन्न भइसकेको छ ।’

हालसम्म प्रदेश सरकारबाट ३१ लाख, भोजपुर नगरपालिकाबाट १७ लाख, वडा कार्यालयबाट छ लाख तथा स्थानीय समुदायबाट एक करोड ८१ लाख चन्दा सङ्कलन गरिएको समितिले जनाएको छ । गुम्बा परिसरमा एक जना व्यक्तिले व्यक्तिगत रूपमा २७ लाख खर्च गरी छोर्तेन निर्माण गरिदिएका छन् । हाल अमेरिका रहेका फराडेन्डी शेर्पाले आफ्नै लगानीमा छोर्तेन निर्माण गरिदिएका हुन् ।

गुम्बा निर्माणका लागि वडा नम्बर ७ र ९ का करिब ११४ शेर्पा परिवारले न्यूनतम २० हजारका दरले सहयोग गरेको गुम्बा व्यवस्थापन समितिले जनाएको छ । गुम्बा निर्माण कार्य विस्तृत परियोजना प्रतिवेदन (डीपीआर) तयार गरी योजनाबद्ध रूपमा अघि बढाइएको छ ।

गुम्बाको बाँकी तथा थप संरचना निर्माणका लागि वडा कार्यालयबाट दुई लाख र नगरपालिकाबाट पाँच लाख रुपैयाँ बजेट विनियोजन गरिएको वडाध्यक्ष रामबहादुर तामाङले बताए । उनका अनुसार विगतका वर्षदेखि नै वडाको उपलब्ध स्रोत–साधनअनुसार गुम्बाको संरक्षण र विकासमा निरन्तर सहयोग हुँदै आएको छ ।

भोजपुर बजार क्षेत्रमै पर्ने पानीट्याङ्की क्षेत्रमा चार रोपनी आठ आना क्षेत्रफलमा गुम्बा निर्माण गरिएको छ । बजार नजिकै भएकाले यस क्षेत्रका धार्मिकस्थलको संरक्षण तथा प्रवर्द्धनमा वडाले विशेष जोड दिएको जनाइएको छ । (रासस)