काठमाडौं – महानायक राजेश हमाल प्रस्तोता रहेको नेपालको पहिलो कृषि केन्द्रित गेम रियालिटी शो ‘रिभोल्युसनरी एग्रिकल्चर वार- र’को प्रसारण बिहीबारदेखि सुरु हुने भएको छ ।

शोका परिकल्पनाकार, निर्माता र निर्देशक शैलेश कँडेलका अनुसार बिहीबार साँझ ८ बजेदेखि हिमालयन टेलिभिजन प्रसारण हुनेछ ।

यो कार्यक्रम ओएसआर रियालिटी युट्युब च्यानलमा भने सोही दिन ८ : १५ बाट सार्वजनिक हुनेछ ।

कार्यक्रममा प्रस्तोता हमाललाई ‘महाहोस्ट’का रूपमा सम्बोधन गरिएको छ ।

कृषकलाई सशक्त, कृषि पेसालाई सम्मानित बनाउन र यसप्रति समाजको दृष्टिकोण परिवर्तन गराउने उद्देश्यका साथ यो कार्यक्रमको सुरुवात गरिएको निर्देशक कँडेलले बताए ।

कृषकलाई प्रोत्साहन र युवालाई आधुनिक कृषि पेसामा आकर्षित गर्न यस कार्यक्रमले सहयोग गर्ने हमालको बुझाइ छ ।

यस कार्यक्रमले कृषि कर्मको महत्त्व, चुनौती र सम्भावनाबारे जानकारी दिनुका साथै दर्शकलाई मनोरञ्जन पनि प्रदान गर्ने हमालले दाबी गरे ।

कार्यक्रममा किसान र कृषि प्राविधिक गरी दुई समूहका प्रतिस्पर्धीहरूबीच रोचक प्रतिस्पर्धा देख्न सकिने निर्देशक कँडेलले बताए ।