एजेन्सी – उत्तरी आप्रवासनको क्रममा अस्ट्रेलिया र पपुवा न्यू गिनीको बीचमा लगभग दुई दिनसम्म निरन्तर उड्ने बगुलाको प्रजातिलाई ट्रयाक गरिएको वैज्ञानिकहरूले बताएका छन् ।

अस्ट्रेलियाका अनुसन्धानकर्ताहरूले न्यु साउथ वेल्सको म्याक्वेरी मार्सेसबाट चराहरू निस्केपछि केही महिनाको अवधिमा आठ प्लुमड एग्रेट र १० ग्रेट एग्रेटलाई पछ्याउन जिपिएस प्रयोग गरेका थिए ।

अस्ट्रेलियाको कमनवेल्थ साइन्टिफिक एन्ड इन्डस्ट्रियल रिसर्च अर्गनाइजेसनका वैज्ञानिकहरूका अनुसार ठूला एग्रेटहरू सबै दिशामा छरिएका पाइए ।

तर प्लुमड एग्रेटहरू सबै उत्तरतर्फ बसाइँ सरेका थिए र एउटा पोर्ट मोरेस्बीको दक्षिणपूर्वमा कालो सहर नजिकै बसोबास गर्नुअघि धेरै महिनामा करिब दुई हजार चार सय किलोमिटर (एक हजार चार सय ९० माइल) उडान गरेको ट्रयाक गरिएको थियो ।

सोमबार प्यासिफिक कन्जर्भेसन बायोलोजी जर्नलमा प्रकाशित निष्कर्षका अनुसार त्यो चराले कोरल सागरमा सात सय किलोमिटरभन्दा बढी उड्न ३८ घण्टा लगाएको थियो ।

वैज्ञानिकहरूले प्लुमड एग्रेटहरूको बसाइँसराइ रेकर्ड गरेको यो पहिलो पटक थियो । अर्को अस्ट्रेलियाली चरा, बार–टेल्ड गोडविटले अलास्काबाट तस्मानिया दक्षिणमा बसाइँ सर्दा मात्र ११ दिनमा १३ हजार पाँच सय किलोमिटरभन्दा बढी नन–स्टप उडान गरेर विश्व कीर्तिमान बनाएको छ ।