काठमाडौं – ‘फ्लाई नेपा’ले अमेरिकामा तय गरेको कार्यक्रम ‘अब हाँस्छ अमेरिका’ रद्द भएको छ । आयोजकले सोमबार विज्ञप्ति जारी गरी कलाकार बिक्की अग्रवालको टोलीसँगको सम्झौता रद्द गरेसँगै यो कार्यक्रम स्थगन भएको जानकारी दिएको हो ।

यसै प्रकृतीको अर्को कार्यक्रमसँग बिक्कीको टोलीले अमेरिका जाने सहमति गरेपछि आफूहरु सम्झौताबाट पछि हट्नु पर्ने व्यवसायिक बाध्यता आएको ‘फ्लाई नेपा’ले जारी गरेको विज्ञप्तिमा उल्लेख गरेको छ ।

‘फ्लाई नेपा’सँग सम्झौता गरिसकेको अवस्थामा उस्तै प्रकृतिको कार्यक्रमका लागि सम्झौता गर्नुलाई हामीले कलाकारको व्यावसायिक धर्म प्रतिकुल आचरणको रुपमा बुझेको छौं,’ विज्ञप्तिमा लेखिएको छ ।

‘फ्लाई नेपा’ले यस कार्यक्रमका लागि ‘कमेडी दरबार’को टोली बिक्की अग्रवाल, पवन खतिवडा, मिस पबी, सुन्दर धिताल, सुजता श्रेष्ठ, विकास अर्याल सम्झौता गरेको थियो । यी सबैसँगको सम्झौताबाट आयोजक पछि हटेको हो ।

कार्यक्रमको प्रतीक्षामा बसेका दर्शकसँग आयोजकले माफीसमेत मागेको छ ।

‘अब सुन्छ अमेरिका’को कार्यक्रमहरु जारी रहेको र ‘अब गाउँछ अमेरिका’ कार्यक्रम चाँडै हुने आयोजकले बताएको छ ।

‘फ्लाई नेपा’ले गत पुसमा ‘अब हाँस्छ अमेरिका २’सहित ‘अब गाउँछ अमेरिका’ र ’अब सुन्छ अमेरिका’को कार्यक्रमको घोषणा गरेको थियो ।