काठमाडौं– प्रधानमन्त्री केपी शर्मा ओलीले पुष्पकमल दाहाल प्रचण्डको सरकारले पनि अध्यादेश ल्याएको दिन सम्झन आग्रह गरेका छन् ।

उनले अध्यादेश ल्याउने अधिकार अघिल्लो सरकारलाई मात्रै थियो भन्ने हो भने बेग्लै कुरा भएको  बताए । 

आइतबार प्रतिनिधि सभाको प्रश्नोत्तर कार्यक्रममा उनले प्रश्न कर्ता पूर्व अर्थमन्त्री वर्षमान पुनलाई २०८० वैशाख २० गतेको दिन सरकारले संसद् सुरु हुनु भन्दा चार दिन अघि अध्यादेश ल्याएको सम्झन आग्रह गरे ।  

‘अध्यादेश ल्याएर संसद्लाई किन होच्याएको भन्ने माननीयज्यूको प्रश्नको मैले जवाफ दिइरहनु पर्दैन, किनभने म सम्माननीय सभामुख मार्फत २०८० वैशाख २० गतेको दिन सम्झन उहाँलाई आग्रह गर्दछु। त्यस दिन उहाँ आफैँ सम्मिलित सरकारले संसद् सुरु हुनु भन्दा चार दिन अघि अध्यादेश ल्याएको थियो’ ओलीले भने, ‘अध्यादेश ल्याउने अधिकार उहाँ सम्मिलित सरकारलाई मात्रै थियो भन्ने हो भने बेग्लै कुरा । तर आवश्यक पर्दा सरकारले अध्यादेश ल्याउन सक्ने व्यवस्था संविधानले नै गरेको छ। हामीले नागरिकलाई सेवा प्रवाहमा छरितोपन ल्याउन, लगानीको वातावरण बनाउन र अर्थतन्त्रका समस्या हटाएर सुधार तर्फ लैजान अध्यादेश ल्याउनु परेको थियो, जुन संसद्‍मा दर्ता भइसकेका छन्।  प्रक्रियाबाट नै यी पारित पनि हुन्छन्।’