सुर्खेत- नेकपा (एमाले)ले आउँदो फागुन २१ गतेका निम्ति तय प्रतिनिधिसभा सदस्य निर्वाचन ‘नहुने सम्भावना’ भन्दै नयाँ राजनीतिक समीकरणको संकेत गरेको छ।

एमाले महासचिव शंकर पोखरेलले शनिबार (कात्तिक २९) सुर्खेतमा सञ्चारकर्मीसँग पार्टीले ‘चुनाव अनिश्चितता’लाई राजनीतिक रणनीतिका रूपमा अघि बढाएको स्पष्ट पारे।

उनले चुनावको तयारी बाहिरबाट हेर्दा देखिएजस्तो सहज नभएको जिकिर गरे। देशमा ‘नयाँ शक्ति सम्पर्क र षड्यन्त्र’ चलिरहेको उनले आरोप लगाए।

वर्तमान राजनीतिक अस्थिरता, ‘संविधानविपरीत कदम’का शृंखला र सरकारका गतिविधिले निर्धारित मितिमा चुनाव हुनेमा उनले शंका व्यक्त गरे।

पोखरेलले भने, ‘देशलाई चुनावको नाम दिएर थप संकटतिर धकेल्ने प्रयत्न भइरहेको छ। एमाले असम्भव चुनावको पछाडि लाग्दैन।’

अन्तरिम सरकार गठनदेखि संसद् विघटनसम्मका प्रक्रियामा एमालेले निरन्तर प्रश्न उठाइरहेको उनले उल्लेख गरे।

उनले विघटित प्रतिनिधिसभालाई पुनः सक्रिय बनाएर नयाँ सहमति निर्माण गर्नुपर्ने धारणा राखे । उनले संसद् विघटनको निर्णयलाई ‘राजनीतिक रूपमा अस्वीकार्य’ भने।

उनले तत्कालीन प्रधानमन्त्री केपी शर्मा ओलीले संसद् विघटन गर्दा सर्वोच्च अदालतले ब्युँताइदिएको उदाहरण दिए। अहिले पनि संसद् पुनर्स्थापनाको सम्भावना रहेको उनको भनाइ थियो।

‘जेनजी’ आन्दोलनपछि सामाजिक सञ्जालमा ठूलो संख्यामा ‘फेक एकाउन्ट’ सक्रिय गराइएको उनले जिकिर गरे। त्यसले आन्दोलनको वास्तविक प्रभावलाई कमजोर पारेको उनले टिप्पणी गरे।