काठमाडौं– राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानबहादुर शाहीले प्रधानमन्त्री केपी शर्मा ओली नेतृत्वको सरकारलाई भ्रष्टाचारी भनेपछि संसद्मा विवाद भएको छ ।

मंगलबार प्रतिनिधिसभाको बैठकमा बोल्दै शाहीले एकपछि अर्को भ्रष्टाचार प्रकरणको संरक्षण गर्न ओली सरकार लागि परेको आरोप लगाएसँगै एमाले सचेतक सुनिता बरालले नियमापत्ति जनाइन् ।

उनले संसद्को निमय २१ को घ अन्तर्गत रहेर नियमापत्ति जनाउँदै प्रतिनिधिसभामा जे पनि बोल्न थालिएको गुनासो गरिन् ।

मंगलबारको प्रतिनिधिसभा बैठकमा शाहीले ‘भ्रष्टाचार गर्न नपाए ओलीको क्याबिनेटमा जानु’ भनेर व्यङ्ग्यात्मक अभिव्यक्ति दिए । उनले एकपछि अर्को भ्रष्टाचार प्रकरणको संरक्षणमा सरकार लागेको आरोप लगाएपछि एमालेले आपत्ति जनाएको हो ।

एमालेकी सचेतक सुनिता बरालले नियम २१ (घ) बमोजिम आपत्ति जनाउँदै भनिन्, ‘प्रतिनिधिसभामा जे पनि बोल्न थालिएको छ। संगीन आरोप लगाउने काम भएको छ, जसमा हाम्रो दलको गम्भीर ध्यानाकर्षण भएको छ।’

बरालले केही दिनअघि सार्वजनिक अडियो प्रकरणलाई लिएर सिंगो नेतृत्वमाथि लाञ्छना लगाउन खोजिएको भन्दै आपत्ति जनाइन्।

उनले भनिन्, ‘देशको नामै फरक बनाएर जुन मनोविज्ञान स्थापित गर्न खोजिएको छ, त्यो गलत हो। गलत गर्नेप्रति कारबाही हुनु पर्छ, तर गलत मानक स्थापित हुनु हुँदैन।’

बरालले सरकारबारे शाहीको अभिव्यक्ति संसद्को रेकर्डबाट हटाउन पनि सभामुख देवराज घिमिरेसँग आग्रह गरिन् ।

संसद्मा यस्ता कडा टिप्पणी र त्यसमा उठेका आपत्तिहरूबीच सत्ता र विपक्षी दलबीचको तनाव बढ्दै गएको छ ।