काठमाडौँ – अख्तियार दुरुपयोग अनुसन्धान आयोगले बाँकेको साविक नरैनापुर गाविसका तत्कालीन अध्यक्ष अजयकुमार श्रीवास्तवसहित १७ जनाविरुद्ध भ्रष्टाचार मुद्दा दायर गरेको छ ।

तत्कालीन गाविसमा सामाजिक सुरक्षा भत्ता वितरण गर्दा गाविस सचिव र मुखियाले मिलेमतो गरी भ्रष्टाचार गरेको अभियोग आयोगले लगाएको हो ।

उनीहरूले नियम विपरीत भत्ता वितरण एवम्‌ लिने खाने समेत गरेको भन्नेसमेत व्यहोराको उजुरी आयोगमा परेको थियो । उक्त उजुरीबारे अनुसन्धान हुँदा नरैनापुरमा आर्थिक वर्ष २०५७/५८ देखि २०७२/७३ सम्म उमेर नपुगेका १९ जनाका नाममा सामाजिक सुरक्षा भत्ता वितरण गरेको भेटिएको आयोगले जानकारी दिएको छ ।

ती व्यक्तिहरूलाई नागरिकतामा उल्लेखित जन्ममिति र नागरिकता जारी मिति अन्देखा गरी ज्येष्ठ नागरिक तथा दलित ज्येष्ठ नागरिकको रूपमा, नागरिकताको प्रमाणपत्र नभएको व्यक्तिलाई एकल महिलाको रूपमा र भारतमा विवाह गरी गएका महिलालाई एकल महिलाको रूपमा तत्कालीन सचिव र अध्यक्षले सामाजिक सुरक्षा लाभग्राही परिचयपत्र जारी गराई सामाजिक सुरक्षा भत्ता वितरण गरी ६ लाख ५६ हजार ७०० रुपैइँ हिनामिना गरेको आरोप उनीहरूविरुद्ध लागेको हो ।

आयोगले विशेष अदालतमा दायर गरेको अभियोगपत्रमा गाविसका पूर्वअध्यक्ष श्रीवास्तवसहित साविक नरैनापुर गाउँ विकास समितिको कार्यालयका सचिव अशोक कुमार श्रीवास्तव, भत्ता बुझी लिने साहजिमा खातुन, अवधराम बढही, राम जिवन पासी, मनोरानी अहिरनी, रामचन्द्र धोबी, लायसरीफ खाँ, मोमिना पठानीन, हामिया पठानीन, नन्कौ मुराउ, जंगली कडरिया, हरीराम अहिर र बारी खाँ गरी थप १द्द जनालाई प्रतिवादी बनाइएको छ ।

यसैगरी साविक नरैनापुर गाउँ विकास समितिको कार्यालयबाट सामाजिक सुरक्षा भत्ता बुझी लिने मोति भुजुवा र सन्तराम बडहीविरुद्ध पनि भ्रष्टाचार मुद्दा परेको छ ।

गैरकानूनी रूपमा सामाजिक सुरक्षा भत्ता बुझेका पाटेश्वरी सिंह ठाकुर, मुज्फर खाँ, राम सुमझ कुर्मी, जलील खाँ र राम सेवक कुर्मीको मृत्यु भइसकेको विवरण प्राप्त भएकोले आयोगले बिगोको हकमा प्रतिवादी तत्कालीन गाविस सचिव सावितराम कुर्मीबाट असुल उपर हुन मागदाबी लिएको छ ।