काठमाडौं – स्वास्थ्य सेवा निजीकरण गर्न खोजिएको भन्दै पाकिस्तानमा प्रदर्शन भएको छ । पाकिस्तानको पञ्जाब प्रान्तस्थित अटोकमा रहेका स्वास्थ्य संस्था निजीकरण गर्न खोजिएको भन्दै स्थानीयहरुले प्रदर्शन गरेका हुन् ।

पञ्जाबको प्रान्तीय सरकारले अटोकमा रहेका आधारभूत स्वास्थ्य एकाई तथा ग्रामिण स्वास्थ्य केन्द्र निजीकरण गर्ने तयारी गरिरहेको पाकिस्तानबाट प्रकाशित हुने डन अखबारले जनाएको छ । प्रदर्शनमा स्थानीय बासिन्दासँगै चिकित्सक र स्वास्थ्यकर्मी पनि सहभागी रहेको डनले उल्लेख गरेको छ ।

यसअघि पनि सो क्षेत्रका विभिन्न अस्पताल निजीकरण गरिएपनि स्वास्थ्य सेवा महँगो भएको र गुणस्तर निरन्तर ओरालो लाग्दै गएको प्रदर्शनकारीको दाबी छ ।

उसै पनि स्वास्थ्य सेवा कमजोर रहेको अवस्थामा स्वास्थ्य संस्थालाई निजीकरण गरे त्यसले अझ भयावह अवस्था आउने उनीहरुले चेतवानी दिएका छन् ।