बैतडी – नेपाली कांग्रेसका नेता एनपी साउदले दुई ठूला दल मिलेर सरकार बन्दा प्रतिपक्ष कमजोर भएका कारण आफूहरु सरकारलाई सही दिशातर्फ डोर्याउन प्रयास गरिरहेको बताएका छन् ।

नेपाल शिक्षक संघ बैतडीको २२ औँ जिल्ला प्रतिनिधि सभा समारोह उद्घाटन गर्दै उनले कांग्रेस प्रजातान्त्रिक पार्टी भएकोले सरकारका कमिकमजोरीबारे सचेत गराइरहेको बताए ।

‘दुई ठूला दल मिलेर सरकार बनेपछि प्रतिपक्ष कमजोर हुने नै भयो । त्यही भएर हामी पार्टीकै मान्छे पनि सरकार गल्ती नगर है, कानुन बनाउँदा दुईतिहाइको दम्भ नराख है, आमजनताको भावनाको सम्मान गर है भनेर आवाज उठाइरहेका छौँ,’ नेता साउदले भने ।

उनले कांग्रेस ‘डेमोक्रेटिक’ पार्टी भएकाले पार्टीकै नेताहरु ‘एडभोकेसी’ गर्दै आएका बताए ।‘नेपाली कांग्रेस डेमोक्रेटिक पार्टी भएकाले लगातार एडभोकेसी गरिराखेका छौँ,’ पूर्व परराष्ट्रमन्त्री साउदले भने, ‘यसमा म पनि लागि राखेको छु । अरु साथीहरु पनि लागिराख्नु भएको छ ।’

साउदले दुईतिहाइको सरकारले आफ्ना प्राथमिकता निर्धारण गर्दा मुख्य प्राथमिकताको क्षेत्रमा प्रवेश गर्न नसकेको पनि बताए ।

‘दुईतिहाइको सरकार बनिसकेपछि यसले प्राथमिकता निर्धारण गर्दा मुख्य प्राथमिकताको क्षेत्रमा प्रवेश गर्न सकेको छैन,’ नेता साउदले भने, ‘मुख्य प्राथमिकताको क्षेत्र भनेको संविधान संशोधन हो ।’

उनले संविधान संशोधन गर्दा शिक्षकहरुका माग पनि समेटिनु पर्ने बताए । ‘यदि संविधान संशोधन गर्नु पर्ने हो भने त्यहींनिर तपाईंहरुका शिक्षासम्बन्धी समस्याहरु पनि आउँछन् । धेरै शिक्षकहरुको गुनासो छ,ु साउदले भने, ुशिक्षक भनेका शिक्षाको उन्नयनका लागि एकल स्रोत हुन ।’