काठमाडौं– मधेस प्रदेशका मुख्यमन्त्री सतिशकुमार सिंहको राजीनामा स्वीकृत भएको छ । 

प्रदेशसभामा आफ्नो पक्षमा विश्वासको मत नआउने भएपछि सिंहले राजीनामा दिएका हुन् । मंगलबार नै प्रदेश प्रमुख सुमित्रा भण्डारीले सिंहको राजीनामा स्वीकृत गरेकी हुन् ।

मंगलबार विश्वासको मत लिने प्रयोजनका लागि बोलाइएको मधेश प्रदेशसभा बैठकमा सम्बोधन गर्दै सिंहले नयाँ सरकार निर्माणका लागि मार्ग प्रशस्त गर्न आफूले राजीनामाको घोषणा गरेको बताए  । 

सो क्रममा सिंहले आफू राजनीतिक गणितका लागि नभई जनताको हित र संवैधानिक सर्वोच्चताका लागि उभिएको बताए  । सङ्कटमा सच्चा मित्र र सच्चा चरित्रको परीक्षा हुने भन्दै सिंहले आज आफू यही परीक्षामा रहेको बताए  । उनले मधेश र मधेशी जनताको भलाइ भन्दा व्यक्तिगत स्वार्थ आफूले नराखेको धारणा राखे । 

जनमत पार्टीबाट मुख्यमन्त्री रहेका सिंहलाई पार्टीका अध्यक्ष डा सीके राउतले राजीनाको निर्देशन दिएपछि उनले राजीनामा दिएका थिए ।