काठमाडौं – एसीसी एसिया कप क्रिकेट प्रतियोगितामा पाकिस्तानले भारतलाई जितका लागि १२८ रनको लक्ष्य दिएको छ। दुबई अन्तर्राष्ट्रिय क्रिकेट मैदानमा जारी खेलमा पाकिस्तानले निर्धारित २० ओभरमा ९ विकेट गुमाउँदै १२७ रन बनाएको थियो।

पाकिस्तानका लागि सहिबजादा फरान सर्वाधिक रन बनाउने खेलाडी रहे। उनले ४४ बलमा ४० रन जोड्दै १ चौका र ३ छक्का प्रहार गरे। फकर जमानले १७, शाहिन शाह अफ्रिदीले ३३ र फहिम अश्राफले ११ रन बनाएका थिए।

भारतका लागि बलिङतर्फ कुलदीप यादवले प्रभावशाली प्रदर्शन गरे। उनले ४ ओभर बलिङ गर्दै मात्र १८ रन खर्चेर ३ विकेट लिए। अक्षर पटेल र जसप्रीत बुमराहले २–२ विकेट लिए भने हार्दिक पाण्ड्या र वरुण चक्रवर्तीले १–१ विकेट लिए।

प्रतियोगितामा दुबै टोलीले आफ्नो पहिलो खेलमा जीत हात पारेका छन्।