काठमाडौं– सर्वोच्च अदालतले आइतबारबाट आफ्नो सेवा पुनः सुरु गरेको छ ।
जेनजी आन्दोलनका क्रममा तोडफोड र आगजनीबाट भवन ध्वस्त भएपछि सर्वोच्चले अदालत परिसरमा टेन्ट लगाएर सेवा सुरु गरेको हो ।
सर्वोच्चले मुद्दा सम्बन्धी जानकारी, तारेख, रिट मुद्दा, बन्दिप्रत्यक्षीकरण रिट दर्ता लगायतका सेवा सुरु गरेको हो । अहिले नै इजलास बस्न सक्ने अवस्था नरहेकाले पुराना मुद्दाको तारेख सार्ने काम भइरहेको सर्वोच्चले जनाएको छ ।
नेपाल बार एसोसिएसनका अध्यक्ष विजय प्रसाद मिश्रले तत्काल पूर्णरुपमा काम सुरु गर्ने परिस्थिति नरहे पनि क्रमशः कामकारबाही सुरु हुने बताए ।
स्थिति सहज भएपछि महिला, थुनुवा र राष्ट्रिय मुद्दाको सुनुवाइ सुरु गर्न सुझाव दिइएको उनले उल्लेख गरे ।
त्यस्तै अदालत पुगेका अधिवक्ताहरूले अदालतमाथि आक्रमण हुनु दुखद भएको बताएका छन् ।
अधिवक्ता ताराप्रसाद अर्यालले आस्थाको धरोहरमा भएको आक्रमण जायज नभएको बताए । उनले बन्दिप्रत्यक्षीकरणको मुद्दाको सुनुवाइ सुरु भइसकेको उल्लेख गरे ।
त्यस्तै अधिवक्ता कमल कोइरालाले बन्दिप्रत्यक्षीकरण र तारिख दिने काम सुरु भएको र अन्य सेवा पनि बिस्तारै सेवा सुरु हुने विश्वास व्यक्त गरे ।
हालै देशभर भएका विरोध प्रदर्शनका क्रममा सर्वोच्च अदालतसहित विभिन्न अदालतमा आगजनी, तोडफोड र लुटपाट हुँदा ठूलो क्षति पुगेको छ ।
आगजनी र हिंसात्मक गतिविधिबाट अदालतका भवन, सवारीसाधन, उपकरण र नागरिकका महत्त्वपूर्ण दस्ताबेज जलेको सर्वोच्चले जनाएको छ ।
प्रतिक्रिया