काठमाडौँ – अन्तरिम सरकारकी प्रधानमन्त्री सुशीला कार्कीले आज देश शून्यमा पुगेको उल्लेख गरेकी छिन् । पदभार ग्रहण गर्दै प्रधानमन्त्री कार्कीले प्रदर्शनका क्रममा भएको आगजनी र तोडफोडका कारण भौतिकसँगै सम्पूर्ण विवरण नष्ट भएर देश शून्यमा पुगेको बताएकी हुन् ।

उनले भनिन्, ‘हाम्रा जति पनि रेकर्डहरू, प्रमाणहरू, सर्वोच्च अदालतका फाइलहरू सबै नष्ट भएर हामीलाई अर्को एउटा ठूलो समस्या भएको । भवनको भौतिक क्षतिले त केही हुँदोरहनेछ, त्यो त बनाउन पनि सकिन्छ, तर ती रेकर्डहरू, ती जमानाका फाइलहरू, ती विवरणहरू सम्पूर्ण नष्ट भएर हामी यतिखेर शून्यमा पुगेका छौँ ।’

उनले कार्यकाल सफलताको कामना गर्ने सबैलाई धन्यवाद पनि दिएकी छिन् । ‘सर्वविदितै छ, यहाँहरू सबैलाई जानकारी छ कि कुन परिस्थितिमा यो अन्तरिम सरकारको मन्त्रिमण्डलको गठन हुनुपर्ने आवश्यकता पर्न आयो । २७ घण्टाको एउटा आन्दोलनबाट मुलुकमा जनधनको व्यापक क्षति हुन गएको छ । देशभरीमा ४० जनाजति युवायुवतीहरूले मृत्युवरण गर्नुपर्‍यो ।’ उनले भनिन् ।

उनले सुरक्षा निकाय, प्रहरी बिटहरू, अदालतलगायत सिंहदरबारसमेत सम्पूर्ण आगोमा विभत्स तरिकाले जलेर गएको भन्दै देशको अवस्था शून्यमा रहेको बताइन् । उनले भनिन्, ‘सुरक्षा निकायहरूका संरचना मात्रै जलेन, हाम्रा सुरक्षाकर्मीहरूको पनि देहवसान भयो । देशभरिका सुरक्षाकर्मीलाई दिएको वहानहरू अब अर्को खरिद नगरी नहुने अवस्था छ ।’