काठमाडौँ- उपेन्द्र यादव नेतृत्वको जनता समाजवादी पार्टी नेपालबाट विभाजित भएका अशोक राईले र राजेन्द्र महतो नेतृत्वको राष्ट्रिय मुक्ति पार्टी नेपालसँग हातेमालो थालेका छन् ।

राई नेतृत्वको जनता समाजवादी पार्टी (जसपा) र महतो नेतृत्वको पार्टीबीच बिहीबार कार्यगत एकताको घोषणा भएको हो।

नयाँ बानेश्वरस्थित एक पार्टी प्यालेसमा भएको घोषणा कार्यक्रममा दुवै दलका शीर्ष नेतृत्व र मूल कमिटीका नेता सहभागी थिए ।

यी दुई दलले पार्टी एकताकै लागि औपचारिक रुपमा ‘कार्यगत एकता’ गरेका हुन् । अब उनीहरूले प्रदेश, जिल्ला र गाउँ कमिटीबीच पनि एकता गराउँदै लाने भएका छन् ।

यी दुई दलले कार्यगत एकता घोषणा गरेकाले प्रदेश, जिल्ला र स्थानीय तहसम्म संयुक्त कार्यक्रम सञ्चालन गर्ने भएका छन् ।

त्यसैमार्फत् एकताको पक्षमा जनमत सिर्जना गरिने भएको हो। यी दलले त्यसक्रममा जनप्रदर्शन, आमसभा, सेमिनार र गोष्ठी गर्ने योजना छ ।

दुवै दलले नेपालको संविधान अपूरो र विभेदकारी रहेको भन्दै त्यसको संशोधनका लागि संयुक्त आन्दोलन थाल्ने भएका छन् । यसका लागि उनीहरूले सरकार, संसद् र सडक—तीनै माध्यमबाट दबाबमूलक कार्यक्रम सञ्चालन गर्ने भएका छन् ।

यी दलले प्रदेशका मुख्यमन्त्री र स्थानीय तहका कार्यकारी प्रमुख पनि प्रत्यक्ष निर्वाचित हुनुपर्ने, स्थानीय तहको निर्वाचन गैरदलीय आधारमा हुनुपर्ने, राष्ट्रपतिले समावेशी मन्त्रिपरिषद् गठन गर्नुपर्ने र मन्त्रीहरू विज्ञ, राजनीतिकर्मी वा विशेषज्ञबाट नियुक्त गर्नुपर्ने अभियान पनि थाल्ने भएका छन् ।

दुवै दलले पूर्ण समानुपातिक निर्वाचन प्रणालीमार्फत जनसङ्ख्याको आधारमा समावेशी लोकतन्त्र सुनिश्चित गर्नुपर्नेमा पनि मत मिलाएका छन् ।