काठमाडौं- नेपाली कांग्रेसले जिल्ला सभापतिहरूलाई पार्टीको भ्रातृ संगठन नेपाल किसान महासंघको आशन्न जिल्ला अधिवेशनमा आवश्यक सहयोग, समन्वय र सहजीकरणका लागि निर्देशन दिएको छ । 

कांग्रेस केन्द्रीय कार्यालयले शुक्रबार ७७ वटै जिल्ला सभापतिहरूलाई परिपत्र गरेर फागुन ७ मा हुन गइरहेको किसान महासंघको जिल्ला अधिवेशनहरूमा आवश्यक सहयोग, समन्वय र सहजीकरणका लागि निर्देशन दिएको हो ।
 
कांग्रेसले महाधिवेशन हुन बाँकी रहेका भ्रातृ संस्थाहरूको केन्द्रीय महाधिवेशन आगामी चैत मसान्तभित्र गरिनसक्ने निर्णय गरेको छ । 

पार्टीको निर्देशनअनुसार किसान महासंघको केन्द्रीय तदर्थ समितिले फागुन ७ गते सबै जिल्लामा अधिवेशन गर्ने निर्णय गरेको छ । 

‘नेपाल किसान महासंघको जिल्ला अधिवेशन सम्पन्न गर्नका लागि नेपाली कांग्रेस जिल्ला कार्यसमितिको तर्फबाट आवश्यक सहयोग, समन्वय र सहजीकरण गरिदिनु हुनका लागि निर्देशनानुसार अनुरोध गरिन्छ,’ कांग्रेस मुख्य सचिव कृष्णप्रसाद पौडेलद्वारा हस्ताक्षरित परिपत्रमा भनिएको छ ।