काठमाडौं – भारतको ७६ औँ गणतन्त्र दिवसमा इण्डोनेशियाका राष्ट्रपति प्रोबोवो सुबियान्तो प्रमुख अतिथिका रुपमा आउने भएका छन् ।

भारत र इण्डोनेशियाले द्विपक्षीय कूटनीतिक सम्बन्ध स्थापनाको ७५ औँ वार्षिकोत्सव मनाइरहँदा सुबियान्तो प्रमुख अतिथिका रुपमा भारत आउन लागेका हुन् ।

भारतीय समाचार संस्था एएनआईका अनुसार यसअघि सन् २०२० मा इण्डोनेशियाको रक्षामन्त्रीका रुपमा सुबियान्तोले भारतको भ्रमण गरेका थिए ।

पाकिस्तानी सञ्चार माध्यमले सुबियान्तोले पाकिस्तानको पनि भ्रमण गर्ने उल्लेख गरेका छन् । यद्यपि सुबियान्तोले पाकिस्तान भ्रमण गर्नेबारे कुनै औपचारिक जानकारी भने सार्वजनिक भएको छैन ।

पूर्वरक्षामन्त्री सुबियान्तोले गत अक्टोबर महिनामा इण्डोनेशियाको आठौँ राष्ट्रपतिको जिम्मेवारी सम्हालेका थिए । सुबियान्तोको शपथ ग्रहण समारोहमा भारतका तर्फबाट विदेश राज्यमन्त्री पवित्र मार्गरिथाले सहभागिता जनाएका थिए ।