काठमाडौं– राष्ट्रिय स्वतन्त्र पार्टी (रास्वपा)का महामन्त्री कविन्द्र बुर्लाकोटीले नेकपा एमालेको एघारौँ महाधिवेशनमा नेतृत्व पुस्तान्तरणको विषयलाई गम्भीर रूपमा सम्बोधन गर्नुपर्ने बताएका छन्।

महाधिवेशनको उद्‌घाटन सत्रमा शुभकामना मन्तव्य दिँदै बुर्लाकोटीले मुलुकमा विद्यमान राजनीतिक चुनौतीप्रति ध्यानाकर्षण गराए। उनले जेन-जी आन्दोलन विस्फोट हुनुमा पछिल्ला ३०–३५ वर्षदेखि देशको बागडोर सम्हाल्दै आएका सबै राजनीतिक दलहरूले जिम्मेवारी लिनुपर्ने बताए। यसमा राष्ट्रिय स्वतन्त्र पार्टी पनि सरकारमा रहँदासम्म आफ्नो हिस्साको जिम्मेवारी लिन तयार रहेको उनको भनाइ थियो।

बुर्लाकोटीले केही समयअघि देखिएको राज्यविहिनता जस्तो अवस्थाको प्रसङ्ग उठाउँदै प्रधानमन्त्री र मन्त्रीहरूलाई सेनाको हेलिकप्टरमार्फत उद्धार गर्नुपर्ने अवस्था किन र कसरी आयो भन्ने विषयमा गहिरो आत्मसमीक्षा आवश्यक रहेको बताए।

‘यस विषयमा गहिरो विश्लेषण नगरी नेपालको समृद्धिको परिकल्पना साकार हुन सक्दैन,’ उनले भने।

उनले नेतृत्व पुस्तान्तरणको माग सबैले बुझिसकेको उल्लेख गर्दै एमालेले पनि यस विषयमा उपयुक्त सम्बोधन गर्ने विश्वास व्यक्त गरे। अन्त्यमा उनले मुलुकको विकास र समृद्धिका लागि सबै राजनीतिक शक्तिहरूलाई सफलताको कामना गर्दै शुभकामना दिएका थिए ।