काठमाडौं- नेकपा एमालेका अध्यक्ष केपी शर्मा ओलीले जेन–जी आन्दोलनको छानबिन गरी दोषीलाई कारवाही गर्नुपर्ने बताएका छन् । भक्तपुरको सल्लाघारीस्थित नेकपा एमालेको ११ राष्ट्रिय महाधिवेशनको उद्घाटन समारोहलाई सम्बोधन गर्दै अध्यक्ष ओलीले आन्दोलनमा अपराध गर्ने अपराधी उम्किन नहुने बताए ।

जेन–जी आन्दोलनपछि संवैधानिक हिसाबले निकास दिन विकल्पहरू राखेको स्मरण गरे । उनले संसदमार्फत संविधान संशोधन हुनुपर्ने बताउँदै प्रतिनिधिसभा पुनस्थापित हुनुपर्नेमा जोड दिए ।

‘कामचलाउ प्रधानमन्त्रीको नाताले मैले संवैधानिक निकासको बाटो देखाएको थिएँ । तर, देशलाई उल्टो दिशामा लगियो । संविधानको बाटो छाडेर संविधान विपरीत ढङ्गले सरकार गठन गरियो । असंवैधानिक सिफारिसबाट प्रतिनिधिसभा विघटन भयो । अनाधिकृत सिफारिसबाट प्रतिनिधिसभा विगठन असंवैधानिक छ । गलत छ ।’ उनले भने, ‘जनताले चुनेका प्रतिनिधि फर्काउनु भनेको जनतालाई नै राजनीतिबाट बाहिर धकेल्नु हो । यस्तो कामले लोकतन्त्र बलियो हुँदैन त्यसैले प्रतिनिधि सभा विगठन हामीलाई मान्य छैन । हाम्रो माग छ, प्रतिनिधिसभा पुनस्थापना होस् र देश लोकतन्त्र र संविधानको बाटोमा फर्कियोस् ।