काठमाडौं– जेनजी अभियन्ता सुदन गुरुङले जेनजीको माग पूरा गर्ने जिम्मा गृहमन्त्री ओम प्रकाश अर्यालले लिनुपर्ने बताएका छन् । गुरुङले जेनजीको माग पूरा नभइ निर्वाचन समेत हुन नसक्ने जिकिर गरेका छन् ।

नेपाल स्काउटको जग्गामा खड्काल्यान्ड प्रालीले बनाएको संरचना भत्काउन पुगेका गुरुङले गृहमन्त्री अर्यालमाथि शङ्का गर्दै जङ्गी अड्डामा पनि सँगै भएको र राष्ट्रपति कार्यालयमा संविधानविद भनेर चिनाइएको दाबी गरे ।

‘उहाँ हामीसँग जङ्गी अड्डामा पनि सँगै हुनुहुन्थ्यो, राष्ट्रपति कार्यालयमा संविधानविद् भनेर चिनाइएको थियो । माग पूरा हुन्छ/हुँदैन उहाँलाई थाहा छ ।’ उनले अगाडि भने’, ‘गिरिबन्धुमा म लडेको हो भनेर कन्भिन्स गरेको मान्छे । यी सबै माग पूरा भएन भने धोका दिनुभएको हो हामीलाई अहिले आएर चुनाव चुनाव भन्नुहुन्छ ।’

गुरुङले गृहमन्त्रीमाथि आक्रोश पोख्दै जेनजीका माग सम्बोधन नगरी चुनाव चुनाव भनेर हिँडिरहेको बताए ।

गुरुङले अर्याललाई एमाले जस्तो भएको भन्ने शङ्का समेत गरेका छन् । उनले भनेका छन्– ‘मलाई त कहिलेकाहीँ गृहमन्त्री त एमाले पो हो कि जस्तो लाग्छ । उहाँको एजेन्डा चुनाव मात्र रहेछ हाम्रो एजेन्डा भनेको देशलाई न्याय दिनु हो।’