काठमाडौं– अन्तरिम सरकारकी प्रधानमन्त्री सुशीला कार्कीको अध्यक्षतामा सोमबार दिउँसो सुरक्षा परिषद्को बैठक बसेको छ।

बैठकमा देशको वर्तमान सुरक्षा अवस्थाको समग्र मूल्यांकन र आवश्यक तयारीबारे विस्तृत छलफल भएको प्रधानमन्त्रीको सचिवालयले जानकारी दिएको छ।

सिंहरदबारस्थित सुरक्षा परिषद् सचिवालयमा बसेको बैठकमा देशको आन्तरिक शान्ति, सीमा सुरक्षा र समसामयिक चुनौतीहरूबारे मन्त्रालयका उच्च अधिकारीहरूले प्रतिवेदन पेश गरेका थिए ।

प्रधानमन्त्री कार्कीले बैठकमा राष्ट्रिय सुरक्षासँग सम्बन्धित सबै निकायहरूबीच प्रभावकारी समन्वय आवश्यक रहेको बताएकी छन् । उनले जनताको सुरक्षालाई सरकारले पहिलो प्राथमिकता राखेर काम गरिरहेको पनि बताएकी छन् ।

यस बैठकमा प्रधानमन्त्री कार्कीसहित ऊर्जामन्त्री कुलमान घिसिङ, गृहमन्त्री ओमप्रकाश अर्यालसहित उच्च सरकारी अधिकारी र सुरक्षा निकायका प्रमुखहरू तथा परिषद् सदस्य सहभागी थिए ।

गत भदौ २३ र २४ गते भएको जेन-जी आन्दोलनका क्रममा हजारौँ थान हतियार हराएका छन् । एक लाखभन्दा धेरै गोली लुटिएका थिए ।

उता देशभरका कारागारबाट भागेका अझै ६ हजार कैदीबन्दी बाहिरै छन् । यो अवस्थामा देशमा सुरक्षा चुनौती बढेको विश्लेषणबीच सुरक्षापरिषद् बैठक बसेको हो । यसअघि आइतबार मात्रै गृहमन्त्री अर्यालले लुटिएका हतियार खोजीका लागि विशेष अपरेशन चलाउने बताएका थिए ।