काठमाडौं– पूर्वोत्तर राज्य मणिपुर पुगेर भारतीय प्रधानमन्त्री नरेन्द्र मोदीले नेपालको अन्तरिम सरकारकी प्रधानमन्त्री सुशीला कार्कीलाई बधाई दिएका छन् । मणिपुरमा आयोजित एक कार्यक्रमलाई सम्बोधन गर्दै प्रधानमन्त्री मोदीले नेपाली समकक्षी कार्कीलाई बधाई दिएका हुन् ।

‘म आज नेपालमा अन्तरिम सरकारको प्रधानमन्त्रीको रुपमा पदभार सम्हालेकोमा १ सय ४० करोड भारतवासीका तर्फबाट श्रीमती सुशीलाजीलाई हार्दिक बधाई दिन्छु ।’ उनले भनेका छन्, ‘मलाई विश्वास छ, उहाँले नेपालमा शान्ति स्थीरता र समृद्धिको मार्ग प्रशस्त गर्नुहुनेछ ।’

उनले नेपालमा पहिलो महिला प्रधानमन्त्रीका रुपमा कार्कीको आगमन महिला सशक्तीकरणका लागि पनि उत्तम उदाहरण रहेको उल्लेख गरेका छन् । प्रधानमन्त्री मोदीले यस्तो अस्थीर अवस्थामा पनि लोकतान्त्रिक मूल्यलाई सर्वोपरि राख्ने सबैको सह्राना पनि गरेका छन् ।

सम्बोधनमा उनले हिमालको काखमा अवस्थित नेपाल भारतको मित्र र निकट साथी रहेको भन्दै दुई देशबीच साझा इतिहास रहेको पनि उल्लेख गरे ।

पछिल्ला घटनाक्रमपछि नेपाली युवायुवतीहरु सडकमा आएर सरसफाइ र रंगरोगन गरेको भन्दै प्रसंशा गरेका छन् ।