काठमाडौं– मुलुकको पछिल्लो राजनीतिक घटनाक्रमपछि लुटपाट र चोरीका घटना बढ्न थालेपछि नेकपा (एमाले) का नेता महेश बस्नेतले संगठित प्रतिरोधको आह्वान गरेका छन् ।

उनले सामाजिक सञ्जाल फेसबुकमार्फत् आ–आफ्नो ठाउँबाट संगठित रूपले लुटेरा, अपराधी, चोर र ठगहरूको प्रतिरोध गर्न आह्वान गरेका हुन् ।

नेता बस्नेतले प्रतिरोधका क्रममा पक्राउ पर्ने लुटेरा, अपराधी, चोर र ठगहरूलाई प्रहरीको जिम्मा लगाउन पनि आग्रह गरेका छन् । उनले कुनै अप्ठ्यारो परे सम्पर्क गर्नभन्दै आफ्नो मोबाइल नम्बर नै फेसबुकमा साझा गरेका छन् ।

‘जो–जो जहाँ–जहाँ छौँ सबैले संगठित रुपमा लुटेरा, अपराधी, चोर र ठगहरूको प्रतिरोध गरौँ । समातेर पुलिसलाई बुझाउनु होला,’ बस्नेतले लेखेका छन्, ‘कोही आत्तिनुपर्ने आवश्यकता छैन । कहीँ कतै अप्ठ्यारो पर्‍यो भने डाइरेक्ट मलाई कन्ट्याक्ट गर्नुहोला । ९८५११४७९८७ ।’

नेता बस्नेतले जेन–जी पुस्ताको आन्दोलनका क्रममा भएको सार्वजनिक सम्पत्ति तोडफोड र आगजनीमा संलग्नहरू माथि कारबाहीका लागि नेपाली कांग्रेस र नेकपा (एमाले)का नेताहरूलाई दबाब दिन पनि सुझाव दिएका छन् ।

‘परिस्थितिमा के के न भयो भनेर पार्टी छोड्ने, फोन अफ गर्ने जनताको रक्षा नगर्ने सार्वजनिक सम्पत्ति र आगजनीमा संलग्नहरूलाई कारबाही गर्न नलाग्ने एमाले–कांग्रेस नेताहरूलाई नेता मानिँदैन भनेर दबाब दिनुस् है,’ उनले लेखेका छन् ।