काठमाडौं– चाडपर्व सुरु भएसँगै काठमाडौं उपत्यकामा चोरी बढ्ने भन्दै प्रहरीले सतर्क रहन आग्रह गरेको छ । 

काठमाडौं उपत्यका अपराध अनुसन्धानका प्रवक्ता तथा प्रहरी उपरीक्षक काजीकुमार आचार्यले नेपालका चाडपर्व लक्षित गरी सीमापारीबाट महिला तथा बालबालिकाको प्रयोग गरी चोरीमा संलग्न गराइने गिरोह सक्रिय हुने बताए ।

खबरहबसँग कुरा गर्दै उनले भने, ‘साउनको अन्तिम सोमबार पशुपति मन्दिरबाट ३० जना चोर पक्राउ परेका छन् । थुनामा राखेर अनुसन्धान भइरहेको छ । चाडपर्वमा महिलाहरूले सुन तथा चाँदीका महङ्गा गहना लगाएर हिड्ने भएकाले भिडभाडमा बच्चा बोकेका आम महिला चोरीमा संलग्न भएको पाइएको छ । उनीहरु कुनै गिरोहद्धारा परिचालित छन् ।’

नेपालमा तीजबाट चाडपर्व सुरु हुन्छ । यतिबेला आर्थिक चहलपहल बढ्ने हुँदा चोरीका घटना पनि बढ्छन् । प्रहरीले बाहिर हिँड्दा गहना लगाउँदा सतर्कता अपनाउन आग्रह गरेको छ । साथै, चोरहरू घरमा पनि प्रवेश गर्न सक्ने हुँदा सुरक्षा अपनाउन सचेत गरेको छ ।