काठमाडौं– ओबीबीसीआई (ओम्नी) ग्रुपले लामो समयदेखि नेपाल वायुसेवा निगमलाई करोडौँ हवाइ भाडा बुझाएको छैन । ओम्नी ग्रुपले कोभिड महामारीको समयमा चीन उडानको क्रममा निगमको जहाज चाटर्ड फ्लाइट गरेर अहिलेसम्म हवाइ भाडा नतिरेको हो ।

वायुसेवा निगमले ओम्नी र नेपाल सरकारको नाममा वि.सं. २०७६ चीन (कोभिड) शीर्षकमा १ करोड ९४ लाख बक्यौताको अभिलेख राखेको छ ।

तत्कालीन केपी ओली नेतृत्व सरकार मातहतको उपप्रधानमन्त्री ईश्वर पोखरेल नेतृत्वमा रहेको कोरोना भाइरस रोग रोकथाम तथा नियन्त्रण उच्चस्तरीय समन्वय समितिले औषधी तथा मेडिकल सामग्री खरिद गर्ने निर्णय गरेको थियो ।

 सोही निर्णयअनुसार मेडिकल सामग्री  खरिद प्रक्रियामा सहभागी भएको ओम्नी ग्रुपले २०७६ चैत १५ गते निगमको जहाज चार्टर उडान गरिएको थियो । 
सो उडानमा तत्कालीन पर्यटन तथा नागरिक उड्डयन मन्त्री योगेश भट्टराई जमानी बसेका थिए ।

तत्कालीन सरकारसँगको सेटिङमा बजार मूल्य भन्दा महँगोमा मेडिकल सामग्री खरिदको आरोप समेत ओम्नी ग्रुपलाई लागेको थियो ।

वायुसेवा निगमले ओम्नी ग्रुप बाहेक सन् २००५ को समयको तत्कालीन सरकार प्रमुखसँग चार करोड ८७ लाख, सन् २०२२ मा पाकिस्तान बाढी राहत सामग्रीको पुर्याउन जाँदा एक करोड १४ लाख र सन् २०२३ मा इजरायल–गाजा युद्ध उद्धार उडानको पाँच करोड ७८ लाख गरी १३ करोड ७३ लाख रुपैयाँ सरकारसँग बक्यौता रहेको अभिलेख राखेको छ ।