काठमाडौं- नेपाली कांग्रेसका प्रवक्ता डा प्रकाशशरण महतले वर्तमान सरकारको एक वर्ष समग्रमा मिश्रित रहेको बताएका छन् ।  

आइतबार संसद् भवन नयाँ बानेश्वरमा सञ्चारकर्मीसँग कुरा गर्दै प्रवक्ता महतले वर्तमान सरकारको एक वर्षमा जनताको आवश्यकता र अपेक्षा पूर्ण रूपमा पूरा हुन नसके पनि केही राम्रा कुराहरू भएको बताएका हुन् ।

डेलिभरी र सुशासनका क्षेत्रमा वर्तमान सरकार अझ बढी गम्भीर भएर अघि बढ्नुपर्ने उनले बताए । उनले सरकारले आफ्ना संयन्त्रलाई मजबुत गरी जनताको सेवामा ध्यान दिँदै काम गर्नुपर्नेमा जोड दिए । 

आगामी दिनमा प्रश्न उठ्न नदिने गरी सरकारले आफ्नो काम कारबाहीलाई अघि बढाउनुपर्ने उनको भनाइ छ ।

त्यस्तै महतले सामान्य प्रशासन मन्त्री राजकुमार गुप्ताको अडियो प्रकरणका विषयमा गहिराइमा गएर हेर्नुपर्ने धारणा राखे । 

पदको दुरुपयोग हुने ठाउँ राख्न नहुने भन्दै उनले यस विषयमा सत्य तथ्य बाहिर आउनुपर्नेमा जोड दिए ।