काठमाडौं- इरान र इजरायलबीच जारी तनावबारे नेपाल सरकारले आफ्नो आधिकारिक धारणा सार्वजनिक गरेको छ । परराष्ट्र मन्त्रालयले शुक्रबार बेलुकी विज्ञप्ति जारी गर्दै पछिल्लो समय इजरायल र इरानबीच विकसित घटनाक्रमप्रति गहिरो चिन्ता व्यक्त गरेको छ ।

मन्त्रालयले जारी गरेको विज्ञप्तिमा नेपालले अवस्थालाई नजिकबाट हेरिरहेको पनि उल्लेख गरेको छ । दुबै पक्षलाई तनाव नबढाउन आग्रह गर्दै सरकारले त्यस क्षेत्र र अन्यत्र शान्ति तथा स्थीरताका लागि संयमता अपनाउन आग्रह गरेको छ । तनाव कम गर्न कूटनीतिक माध्यम र वार्ताको प्रयोग महत्वपूर्ण हुने विज्ञप्तिमा उल्लेख गरिएको छ ।

दोहा र तेल अभिभमा रहेका नियोग इरान र इजरायलमा रहेका नेपाली समुदायसँग सम्पर्कमा रहेको सरकारले जनाएको छ । सरकारले दुबै मुलुकमा रहेका नेपाली नागरिकलाई अवस्थाबारे सावधानी अपनाउन र आवश्यक चेतावनी र स्थानीय निर्देशिका पालना गर्न पनि आह्वान गरेको छ ।