काठमाडौं- राष्ट्रिय स्वतन्त्र पार्टीका सांसद मनिष झाले अहिलेलाई नेकपा माओवादी केन्द्रसँग डिभोर्स भएको बताएका छन् ।

भिजिट भिसा प्रकरणमा सदनको अवरोध खोल्नको लागि सत्तापक्ष र प्रतिपक्षबीच दुई बुँदे सहमति भएपछि झाले यस्तो प्रतिक्रिया दिएका हुन् । उनले सत्तापक्ष र प्रमुख प्रतिपक्ष माओवादीबीच भएको २ बुँदे सहमतिले अहिलेको समस्याको समाधान नगर्ने दाबी गरे ।

उनले माओवादी केन्द्रका अध्यक्ष प्रचण्डले आफूहरूलाई दुई बुँदे सहमतिमा आउन भने पनि आफूहरूले अस्वीकार गरेको जानकारी दिए ।

संसद् भवनमा पत्रकारहरूसँगको संक्षिप्त कुराकानीमा झाले यस्तो बताएका हुन् ।

‘माओवादीले सहमतिका लागि हामीलाई पनि आग्रह गरेको थियो । तर, उहाँहरूको सहमतिमा समस्याको सामाधान गर्ने ठोस प्रस्ताव उल्लेख नभएकाले हामी सहमत हुन सकेनौँ’, उनले भने, ’उहाँहरूले छानबिन समिति बनाउने भन्नुभएको छ । त्यो समिति गृह मन्त्रालयकै कुनै सहसचिवको नेतृत्वमा बन्न सक्छ । त्यसले समस्याको कुनै समाधान गर्दैन ।’