काठमाडौं- राष्ट्रिय प्रजातन्त्र पार्टीका अध्यक्ष राजेन्द्र लिङ्देनले गृहमन्त्री रमेश लेखक मुछिएको भिजिट भिसा प्रकरणमा प्रमुख प्रतिपक्षी नेकपा माओवादी केन्द्रले वीरतापूर्वक आत्मसमर्पण गरेको बताएका छन् ।

शुक्रबार बसेको प्रतिनिधिसभाको बैठकमा सभामुख देवराज घिमिरेले उपलब्ध गराएको समयमा बोल्ने क्रममा दुई सातासम्म संसद् अवरुद्ध गरेर माओवादीले अन्तिममा आत्मसमर्पण गरेको बताए ।

लिङ्देनले प्रमुख प्रतिपक्षी नेकपा माओवादी केन्द्रले लुटतन्त्रको रक्षाका लागि सत्तापक्षसँग सहमति गरेको टिप्पणी गरेका छन् ।

माओवादी केन्द्रका प्रमुख सचेतक हितराज पाण्डेपछि बोल्दै उनले लुटतन्त्रको रक्षाका लागि सत्तापक्षसँग सहमति गरेको टिप्पणी गरेका हुन् ।

‘जहाँसम्म यो १७–१८ दिनदेखिको नाटक जो हामीले देखिराखेका थियौँ, देशले देखिराखेको छ । र, अहिले प्रमुख प्रतिपक्षी दलको नेताले वीरतापूर्वक आत्मसमर्पण गर्नुभएको जुन सुन्न पाइयो,’ अध्यक्ष लिङ्देनले भने, ‘वीरतापूर्वक बहादुरीकासाथ पछाडि हटेको सुन्न पाइयो । यो हुने नै यही थियो । उहाँले भन्नुभयो, गणतन्त्रको रक्षाका लागि । गणतन्त्रको रक्षाका लागि होइन, लुटतन्त्रको रक्षाका लागि यो समझदारी भएको हो भन्ने कुरा आम जनताले बुझिराखेको छ ।’