काठमाडौं- नेपाली कांग्रेसका सांसद दीपक गिरीले वर्तमान सरकार गभर्नर नियुक्तिको ‘म्युजिकल चियर’ मा मस्त रहेको बताएका छन् ।

प्रतिनिधि सभाको मंगलबार बसेको बैठकमा बोल्दै गिरीले सबैतिर अन्योल र अलमल रहेको अवस्थामा सरकारको ध्यान गभर्नर नियुक्तिमै रहेको टिप्पणी गरेका हुन् ।

महाप्रसाद अधिकारी नेपाल राष्ट्र बैंकबाट बिदा भएको दुई महिना हुन लागिसक्दा पनि सरकारले नयाँ नियुक्ति गर्न नसकेको सन्दर्भमा गिरीले यस्तो बताएका हुन् ।

२०७६ चैत २४ गते राष्ट्र बैंकको गभर्नरमा नियुक्त भएका अधिकारी गत चैत २२ गतदेखि औपचारिक रूपमा बिदा भइसकेका छन् । उनी बिदा हुनुअघि गभर्नर नियुक्त गर्नुपर्नेमा कांग्रेस र एमाले मिलेर बनेको सरकार अलमलमा परेपछि सत्तारुढबाटै विरोध भइरहेको छ ।

‘भर्खरै नीति तथा कार्यक्रम बहुमतबाट पास भएको छ । सरकार गभर्नर नियुक्तिको ‘म्युजिकल चियर’ मा मस्त छ । कुलिङ पिरियड २ वर्ष कि ३ वर्ष भन्नेमा अन्यौल छ’, उनले भने, ‘प्रदेश सरकार अधिकार पाएनौँ भनेर क्रन्दन पोखिरहेको छ । शिक्षकहरू भर्खरै सन्तोष या असन्तोष भएर हो, चित्त बुझाएर हो कि चित्त नबुझाएर हो ? फर्किएका छन् ।’

गिरीले अलमल नै अलमलका बेला सरकारको नीति तथा कार्यक्रम बहुमतले पास भइसकेकाले अब नअल्मलिएर दृढता साथ अघि बढ्न पनि आग्रह गरे ।