धनगढी- भीरबाट लडेर गम्भीर घाइते भएकै अवस्थामा घटमुना अस्पताल पुर्‍याइएकी विष्णुमाया रोकायाको उपचार अभावमा ज्यान गएको छ।

टाउको र छातीमा देखिएको गम्भीर चोट र धेरै रगत बगेकाले अचेत अवस्थामा रोकायालाई स्थानीय महिलाहरुले अस्पताल पुर्‍याएका थिए ।

अस्पताल पुर्‍याएलगत्तै चिकित्सकले बाहिर लान सुझावसहित रिफर गरिदिएका थिए। तर आफन्तले आर्थिक अभावको कारण देखाएर सकेको उपचार गर्न आग्रह गरे ।

स्वास्थ्यकर्मीले जोखिम मोल्न नसक्ने जानकारी दिँदा पनि आफन्तले नमानेपछि उपचार जारी राखे । अन्तत: उपचारका लागि भर्ना भएको तीन दिनपछि विष्णुमायाको अस्पतालको शय्यामै मृत्यु भएको छ ।

गौमुल गाउँपालिका-५ कोटकी १६ वर्षीया विष्णुमाया दाउरा लिन जंगल गएकी थिइन् । विद्यालय जानुअघि बिहानै जंगल गएकी रोकाया भीरबाट लडेर गम्भीर घाइते भइन् ।

उनीसँगै जंगल गएका आफन्तले थाह पाएर घटमुना अस्पताल ल्याएका थिए । टाउकोमा चोट लागेकी रोकाया अस्पतालसम्म पुग्दा गम्भीर अवस्थामा पुगिसकेकी थिइन् ।

उपचारमा संलग्न डाक्टर कुश नेपालीका अनुसार सिटी स्क्यानपछि उपचार गर्न सहज भएर बिरामीको ज्यान जोगिने सुझाव दिएका थिए ।

सुरुमा आर्थिक अभावको समस्या आफन्तले देखाए । स्थानीय र जनप्रतिनिधीसहित कर्मचारीले लगत्तै एक लाखसम्म जोहो गरिसकेका थिए ।

तर, विरामीसँगै जाने मान्छेसमेत भेटिएनन् । उनका बुवा भारतमा छन् । आमाले जान आँट गरिनन् । आफन्त कोही तयार भएनन् ।

घटमुना अस्पतालबाट माार्तडी पुर्‍याउनसमेत नसकी विष्णुमायाले बिरामी शय्यामै उपचारकै क्रममा ज्यान गुमाइन् ।

‘गम्भीर चोट थियो । बाजुरामा उपचार सम्भव थिएन । शनिबार नै थप उपचारका लागि धनगढी रिफर गरिएको थियो । तर आफन्तले लिएनन् । हामीले सकेको गर्‍यौँ, तर बचाउन सकिएन्’, डा. नेपालीले भने ।

हेलिकप्टर मगाउने पहलमा पनि पहल ढिला भएको थियो । ठूलो पैसा तिर्न परिवारले आँट गरेनन् । पैसा नभएकाले विष्णुमायाको ज्यान जोगाउन परिवारले सकेनन् । दुर्गम गाउँमा यस्ता घटना वर्षेनि दोहोरिइरहन्छन् ।