काठमाडौं– सञ्चार तथा सूचना प्रविधिमन्त्री जगदीश खरेलले राजनीतिक दलमा युवाहरूलाई कार्यकर्ता र दास मात्रै ठान्ने प्रवृत्ति अब अन्त्य हुनुपर्ने बताएका छन् । 

शुक्रबार ललितपुरमा आयोजित सामाजिक जबाफदेहिता : मिडिया र युवा संवादमा मन्त्री खरेलले वर्षौवर्ष एउटै व्यक्तिले राजनीतिक दलमा पद ओगटेर बस्दा देश र पार्टीको हित नहुने भन्दै अव युवाहरूलाई कार्यकर्ता र दास मात्रै ठान्ने प्रवृत्ति अन्त्य हुनुपर्ने बताएका हुन् ।

विगतदेखि दलहरूमा एउटै व्यक्ति हाबी हुने र युवालाई निषेध गर्ने प्रवृत्ति अन्त्यका लागि युवाहरूले आवाज उठाउनुपर्ने उल्लेख गर्दै मन्त्री खरेलले मागेर आफ्ना माग पुरा नभए खोसेर लिनुपर्ने धारणा राखे । 

उनले अहिले भइरहेका राजनीतिक दलहरूका शीर्ष नेताको उमेर समूह, अनुभव, राजनीतिमा ओगटेको ठाउँ र युवाहरूलाई अगाडी बढ्न नदिएको यथार्थ भुल्न नमिल्ने बताए ।

अहिलेका युवाहरू कुनै वादको बन्धक बनेर नबस्ने उनले बताए । उनले नेपाली राजनीतिमा युवाहरूको जबरजस्त उपस्थिति हुनेवाला रहेको भन्दै कसैले रोक्न नसक्ने जिकिर गरे । 

मन्त्री खरेलले यस पटक मुलुकको परिवर्तनका लागि जेन-जीहरुले निस्वार्थ रुपमा आन्दोलन गरेको बताए । 

मुलुकलाई भ्रष्टाचारमुक्त बनाउँदै सुशासनतर्फ अघि बढाउने माग युवाहरूले राखे पनि आन्दोलनपछि बनेको सरकारमा जेन-जी युवाहरू आउन नचाहेको उनले बताए ।