धनगढी – सुदूरपश्चिम प्रदेश खेलकुद परिषद्को सदस्य सचिवमा लोकबहादुर खड्का (रवि) नियुक्त भएका छन्। सामाजिक विकास मन्त्रालयको सिफारिसमा प्रदेश मन्त्रिपरिषद्को बैठकले खड्कालाई परिषद्को सदस्य सचिवमा नियुक्त गरेको हो।

प्रदेशका आन्तरिक मामिला तथा कानुनमन्त्री हिरा सार्कीका अनुसार खड्काले आजै पद तथा गोपनीयताको शपथ लिने कार्यक्रम तय भएको छ।

फुटबल र हक्कीका पूर्वखेलाडी खड्का खेल क्षेत्रमा लामो अनुभव बोकेका व्यक्ति हुन्। उनले आधा दर्जनभन्दा बढी राष्ट्रिय फुटबल प्रतियोगितामा प्रतिनिधित्व गरिसकेका छन् भने एक पटक राष्ट्रिय हक्की प्रतियोगितामा पनि सहभागिता जनाइसकेका छन्।

खेल प्रशासनको क्षेत्रमा पनि खड्काको अनुभव उल्लेखनीय छ। उनी कैलाली जिल्ला कुस्ती संघका अध्यक्ष भइसकेका छन्। त्यस्तै, क्रिकेट विकास समिति क्षेत्र नम्बर ९ का कोषाध्यक्षका रूपमा समेत जिम्मेवारी सम्हालिसकेका छन्। पूर्व क्षेत्रीय खेलकुद विकास समितिमा सदस्यका रूपमा पनि उनले काम गरिसकेका छन्।

नेपाली काँग्रेस निकट खड्का खेलकुद क्षेत्रसँगै राजनीतिक क्षेत्रमा पनि सक्रिय छन्। सुदूरपश्चिम प्रदेश खेलकुद परिषद्को सदस्य सचिव पद झण्डै तीन महिनादेखि रिक्त थियो। २०७७ चैतमा दीपकबहादुर सिंह चार वर्षका लागि नियुक्त भएका थिए। उनको कार्यकाल २०८१ चैत ९ गते सकिएको थियो।